停咗牌成3個幾禮拜嘅建發（223），原本傳聞會2供1集資，每股定價0.28至0.29元。
不過，單嘢搞咗好耐都唔成事，終於改為發行認股證集資，每份發行價0.58元，集資淨額約2400萬元。
建發嘅認股證初步行使價為每股0.69元，計埋發行價，總行使成本為每股1.27元，比起建發停牌前收市價1.55元，折讓雖然達18%，但較之前傳出嘅大折讓供股計劃，相信對股價嘅影響會冇咁大。
經紀黃就唔係咁講，佢話小初有所不知，人哋停牌咁耐，必然係因為有人唔高興公司以大折讓供股，致令計劃胎死腹中，所以改為發行認股證。
不過，最怕呢啲嘢阻得一時唔阻得一世，真係唔知幾時又會搞搞新意思，嚇小股東一跳，所以佢都係落咗車先算，好彩佢嘅入貨價夠平，所以唔使輸錢。
建發噚日復牌，下跌12.9%，收1.35元，成交金額有成1316萬元，沽壓亦唔細，但暫時仍然守住1.27元。
慕容小初