好多朋友成日都話，大使做呢份工好「筍」，因為奉旨做好人，不過如果大家知道我哋平日經常要同啲所謂「求助者」鬥智鬥力，你就知唔係想像中咁簡單。
大使每日嘅工作，除咗採訪同寫稿之外，就係接聽求助人士嘅電話，大使覺得呢樣嘢最「艱巨」，點解呢？因為有啲人會「變身」打嚟求助，企圖博取大使同情。好似有啲求助者之前打過嚟，下次佢又會扮係「求助者」嘅阿媽、甚至阿仔，話「求助者」點慘，要大使再幫，俾大使拆穿西洋鏡之後，就匆匆收線。
試過有求助者明明知道邊位大使跟開佢個case，但就好似失憶咁，再打嚟嘅時候就話係第一次求助，搵另一位大使幫佢，希望「過骨」可以再得到幫助。
有啲求助者更加會講一啲千奇百怪嘅求助「原因」，企圖取信於大使。好似有位女士早幾日打嚟，竟然話佢一次過帶咗萬幾蚊綜援出街，點知唔覺意「跌咗」，佢根本冇辦法自圓其說，又點叫大使相信佢呢？
大使喺呢度要強調，絕對唔係一竹篙打一船人，絕大部份打嚟求助嘅個案真係有實際經濟困難，而大使喺審批過程中，都會做足所有程序去核實個案嘅真實性，例如問吓負責佢個file嘅社工、社署，同埋要佢提交有關文件等等，大使嘅職責係去幫人，亦一定會盡力確保善長所捐嘅一分一毫，都係捐得有價值嘅。
暖流熱線
電話：29908688
傳真：23702192
電郵：
網址：