十月十六日早上十時許，喺皇后大道中攞咗一份《文匯報》號外，就碰到科技Y。科技Y清減咗好多噃，身上件西裝明顯闊咗半個碼。於是同佢講：「乜瘦咗咁多？」科技Y上下打量左丁山：「乜你肥咗咁多？」左丁山為之苦笑，平日食多事繁，冇時間運動，有空就想攬住張床，點樣keep到fit吖？科技Y話：「幾個月前，醫生話我不宜再肥落去，於是下定決心減肥。減肥要講科學與決心，唔使畀錢人哋幫你瘦身嘅。我就同你相反，現在食少事不繁，大把時間跑步游水打波，已經減咗十幾磅嘞，重可以着番九六年嘅衫㖭！」
九六年嘅衫，乜有識認嘅咩？原來科技Y做事好有規律，裁縫同佢做嘅恤衫西褲西裝都繡上年份，以前佢年年增肥，年年做新衫、買新衫。咁多衫，當然唔會着爛，最近既然瘦番，已經打入冷宮嘅九六年恤衫就重見天日。科技Y話：「我發下一個願，以後唔再買衫！」唉吔，闊佬減肥，或會殃及池魚，降低香港消費，佢哋大把水，咁多年來買落十打八打西裝，恤衫無數，的確唔使買新衫嘅，你估需要學碧咸追潮流咩。但一旦減肥成功，着番七年前嘅衫，裁縫同男士服飾專門店就少咗啲大客咯。科技Y事業成功，做事有決心，話減肥就減肥，令左丁山羨慕，亦受到刺激，話過以後唔買新衫，要逼自己着番已打入冷宮嘅西褲西裝。學唔到科技Y咁有錢，學吓佢嘅精神都好吖。