噚晚我求大俠睇ESPN直播阿仙奴對車路士場英超榜首大戰，聽到把熟悉的聲音，原來ESPN亞洲總部搵咗何鑑江，過去新加坡客串講番兩個星期波。
相信好多球迷都好似我求大俠咁，聽何老鑑講本地波成長，每次聽到佢把聲總會有份親切感。不過，噚晚聽佢講阿仙奴對車路士，可能老鑑唔算太熟英超球隊，以及唔用開香港球迷聽嘅譯名，搞到成個上半場都將「車路士」講成「修爾斯」；又將「艾殊利高爾」講成「艾拔高爾」。
何老鑑不愧老行尊，經過半場適應後，下半場講得暢順好多，重嗱嗱聲修正番上半場講錯嘅譯名。嗱呢啲就係專業精神嘞，相信以何老鑑的豐富經驗，熱完身後應該可以有更好發揮。
最近世界球壇興啲乜？輪姦？犯法㗎，咪制㖭呀！計我求大俠話齋，呢輪興起被換出場後發老脾就真！早前雲尼斯達羅以及韋利喺國家隊，都曾因為不滿被換出場而掟嘢發洩。前晚見費高喺皇馬場邊掟水樽，又係不滿被換出，球星死穴被點中，冇計！
盛傳曼聯後衞李奧費迪南缺席藥檢，係因為當日佢同同居女友搬屋期間，心思思想見另一親密女友羅蘭，於是俾兩個女人塞住個腦，唔記得去藥檢。另外又傳聞佢同另一流行女歌手莎拉及巴西名模泰蒂妮有路，私生活亂晒龍，所以就算冇藥檢單嘢，都咪使旨意我大俠會幫佢。
記憶中攞過英超每月乜乜最佳球隊都冇好結果，好似八月份最佳領隊雲格攞獎後，即刻嗰場波就打和樸茨茅夫，而車仔雲尼亞里同林柏特分別成為九月份最佳領隊及球員後，前晚就因為門將古迪仙尼犯錯，香俾阿仙奴。我求大俠諗如果啲獎咁邪，攞嚟把鬼。
巴西聖保羅嘅廿二歲巴西前鋒法比安奴係就係好波（喺今屆巴西聯賽入咗二十三球），但弊在極唔好老脾，佢喺今屆經已七次被逐，所以要搵心理醫生幫手。查實好多好波球員都唔好老脾，好似前曼聯球星簡東拿咁，如果法比安奴收晒火，話唔埋會影響喺球場上嘅表現。