八方前排講過APEC會議好好招呼，估唔到商界搞的APEC工商領導高峯會，反而一鑊泡。
今年高峯會搞搞新意思，往年只要有APEC大會證件就可以採訪，今年竟然要記者另外報名；不過最神奇嘅都算係有香港記者申請之後，大會覆電郵話唔使報名，去到之後又再反口，又話要報喇，搞到記者一頭煙。
更離譜係昨日國家主席胡錦濤演講，成棚記者喺新聞中心聽直播，點知兩個電視機都冇聲，搞咗一大輪先至搞掂，失驚無神又變成英文傳譯，搞到要錄胡主席現場聲嘅電視台及電台記者大嗌救命。
記者搞到頭暈暈，好多人都聽漏一個笑位；泰國總理他信特登歡迎到場聽主席講話嘅特首董建華，但係就叫錯「CE」做「CEO」，之但係咁，呢次錯誤相對阿董上次俾人叫「SARS」特首，已經係濕濕碎。
傳真︰2623-9278
電郵︰