末代港督彭定康早幾個月打高球整傷咗隻腳，要坐輪椅，《蘋果》當日都有報道過，原來肥彭喺香港重有好多老友，包括佢曾經成日幫襯食蛋撻嗰間泰昌餅家。
早前泰昌個老闆歐陽天潤睇《蘋果》知老友受傷，專登搵人幫佢寫咗封英文信，喺八月中寄去牛津大學畀佢慰問一番，點知原來肥彭未上班，封信後嚟轉寄咗去歐盟。
肥彭見班老友咁有心，喺九月九日用歐盟嘅專用信紙寫番封信多謝佢哋，重話今次扭傷咗條筋，可能要段較長嘅時間先至可以完全康復。
歐陽老闆同班夥計都話「冇諗過佢會回信」，所以好開心，將封信貼咗喺門口，等啲街坊同客人都知道吓肥彭嘅近況。一件小事，充滿人情味，證明「民望」呢樣嘢，係冇得夾硬催谷嘅。肥彭有情，離開咗一個殖民地咁耐，都重記掛住一個開餅家嘅中國人，泰昌老細有義，公然擁護肥彭，唔怕土共老左圍攻。老董，學吓嘢喇。
傳真︰2623-9278
電郵︰