正當第37屆東京車展開幕日期日漸逼近時，各大日本車廠都先後公布將於場內展出車款嘅資料，以吸引車迷注意；而本田車廠亦唔例外，日前亦公布咗有關展出車款，其中一部走高性能跑車路線嘅HSC概念車，最為惹人注目呢！
雖然廠方未有公布太多關於HSC嘅資料，但有消息指此車會起用一台輸出馬力高達300匹以上嘅V型六汽缸引擎，加上連軚盤轉波功能嘅半自動波箱、極輕嘅車重及跑車化懸掛組合，性能表現可謂毋庸置疑。至於外形方面，呢款HSC概念車擁有極具流線型設計，加上巨型跑車合金胎軨組合，一份高性能跑車韻味油然而生；而設計獨特嘅一組頭燈，亦予人魅力盎然之感呢！有興趣嘅朋友，就要密切留意更多關於東京車展嘅消息喇！