臨近萬點大關，美股有些少腳軟，港股今日有機會借勢調整。不過，市內依然錢多，即使有調整，相信仍係大漲小回局面。
紅色股份近日有勢，老牌紅籌兼藍籌中遠太平洋（1199）上周四突破上月高位9.85元，跟住後抽整固，照計重有得去，中遠Call輪要留意。
掛牌買賣嘅中遠Call輪有4件，9286太過價內冇成交；9017係鎖定回報輪，要查清條款先至好玩；9187上周五喺正股調整之際彈升9%，行先一步，但呢件數據麻麻。剩低嗰件9863玩到年尾，數據比較合理，成交又最多，一於揀佢。
救樓市深化措施公布後，地產股有獲利回吐，實屬正常。不過，新地（016）上周五已見大力反彈，話唔定其他大地產股亦會跟隨，例如長實（001）。長實樓盤宇晴軒，據講今個禮拜會加價，話唔定對股價有刺激。美股回軟，長實今日或會先跌多少，到時不妨低吸長實Call輪9074或9065。
章 盛