喺呢度，無論坐任何位置都可以觀賞到維港海景；而且所有菜式均由酒店級大廚主理設計；內裏更設有酒吧區，歎紅白酒、Cocktail之餘，重可以透過牆上嘅Plasma大電視收看體育節目；一間快餐店竟然可以有咁嘅配套，「快餐，原來可以更多。」呢句宣傳語句，絕非虛言。
記者：馬慶武 攝影：陳陶鈞
入到呢間can.teen，一樣要先企定定睇餐牌，再排隊買飛，之後再攞食物，運作形式同一般快餐店無異。不過，呢間「快餐店」卻額外提供全落地玻璃無敵海景，更設有BarArea供應紅、白酒、Cocktail等飲品，嚟食早餐、午餐之外，放工重可以同班同事嚟HappyHour，以快餐店嚟講，的確夠晒破格。
「我哋有開揚嘅全海景景觀、酒店級嘅大廚，領取酒牌之後，更有啤酒、Cocktail、紅白酒供應，一切配套同高級餐廳無乜分別。」負責人譚先生話由於佢哋位處喺中環呢個金融中心，所以提供一個用膳嘅地方之外，更希望人客入到嚟可以放低埋緊張嘅心情，盡情Relax。「我自己都係上班族，知道朝9晚5加OT嘅生活實在好悶，最希望可以有一個可以Relax嘅地方。不過時間緊迫，Relax嘅時間可能只係午飯嘅一小時，或者『蛇王』嘅十幾分鐘，所以呢度以快餐形式運作。當然，價錢都係同快餐一樣咁抵。」
食物多元化，亦係快餐店吸引人之處，除有燒味供應，亦有各種西菜及中菜。主打方面，不得不提係一個自選配料、醬汁嘅炒意粉Counter，收銀處買飛後，就可以嚟呢個Counter自選材料、醬汁、意粉嘅配搭，淨係意粉都有六款可以揀，更有廚師喺度即叫即炒。新鮮熱辣度身訂做嘅炒意粉，喺其他快餐店點會食得到？
為慶祝can.teen今日正式開幕，今日午餐時段（12:00nn-2:30pm）去can.teen享用午餐餐盒可以享有半價優惠（除咗飲品之外），喺中環返工嘅，快啲動身去體驗呢個着數啦！
呢期主打嘅係即選料即炒嘅意粉Counter，不過負責人話會因應不同季節變身不同Counter，保證有驚喜。
$38可以選三款不同配料，除蘆笋、雜菇等素菜外，重有鮮蝦、肉腸等配料選擇，另外亦可選菠菜麵、墨魚麵、扁意粉、長通粉其中一種，再配以香草汁、茄汁或白汁，配搭極多，真係食足一個月都唔會悶。
用鴨骨加多種香料熬成嘅鴨湯底味道濃郁，配合大大粒嘅煙韌西米，口味新鮮。燒鴨胸肉肉質夠腍，重有新鮮蟹肉做配料，而且配上一碗瀨粉，保證夠飽肚。
（左）PeachSoda
蜜桃汁加檸檬汁及梳打調成，Coctail中有粒粒蜜桃果肉，啱晒女士們口味。
（右）BlueSky
主要成份有橙汁及菠蘿汁，而且加入少許糖漿，非常香甜。
(含酒精飲品將於約3星期後供應)
（左）PinaColada
用菠蘿汁加椰汁配Rum酒調校而成，充滿果汁香味，夠晒清新，夠晒熱帶風情。
（右）SeaBreeze
喺紅梅汁及橙酒中加入伏特加酒，酒味較重，不過酸酸甜甜極易入口。
地址：中環金融街8號IFCL1108號舖
電話：21678665
營業時間：星期一至五7:30am-9:00pm，星期六7:30am-7:00pm；星期日及公眾假期9:00am-7:00pm
