新盤大多設有業主推薦親友買樓優惠計劃，東涌藍天海岸上月底開始到今個月底，搞咗個東涌居民同藍天業主推介親友買樓，獲現金獎賞優惠，暫時已有超過四十宗轉介，有業主喺一周內介紹三名好友入市，賺番一筆！
據香港興業市務經理林紅講，呢名業主年初以約二百二十萬，買咗藍天海岸三座中層三房單位，及後推介友人兄妹，各以逾二百萬買入三房戶，另一友人，就以百多萬買兩房單位，一共獲得二萬五千蚊獎金，睇嚟佢好有條件做地產經紀。
發展商公布，有關計劃推行至今，成功轉介個案逾四十宗，約佔期內整體銷售量一成；發展商喺今年4月都推過呢個計劃，但只得十幾宗轉介。個案中有一半係由區內其他屋苑業主轉介，另外又有同區租客，購入藍天後，推薦友人買樓，收取獎金。
樓市轉旺，但市場上好多人驚可能只係小陽春，經絡集團行政總裁黃錦康就好肯定咁講係轉勢，因為今次係政府政策上出現轉變所致。
佢話樓市喺沙士之後已經好轉，到7月1號後，政府政策明顯轉變，新盤加價後，市場仍然維持承接力，係轉勢嘅證據。同時近一個月二手成交量都大增。
黃錦康指出，政府講明未來嘅樓宇供應量，等發展商有數得計，自然唔肯平賣啦。
不過，佢就話樓價唔會出現好似一年升五成嘅大漲局面，因為政府隨時會出手打壓過急升勢，所以係旺市唔旺價嘅格局，估計二手成交表現好過一手。
高力國際研究部董事盧永輝話，中區寫字樓因供應多，租金殘足幾年，吸引邊緣地區嘅中小型租客遷入，趨勢重未完。
呢類租客選擇搬去中區嘅另一個原因，係覺得會對公司嘅名聲同業務發展有幫助。但部份租客手頭資金較為緊絀，若搬入新寫字樓前要畀一大筆裝修費，都幾頭痛，中區商廈業主為招攬佢哋，有埋裝修津貼，甚至為個別租客提供度身裝修㖭。當然，免租期就會縮短番啲，咁就皆大歡喜啦。
盧永輝講，中區商廈嘅空置率回落咗啲，佢估計租金明年中見底，並穩步回升。
將會係尖沙嘴海旁標誌之一嘅海運大廈摩天輪，九倉為令在摩天輪上可望到更靚嘅維港景，將坐向稍稍擰一擰，令原先與海運大廈平行嘅設計，變成與維港平行。
九倉為咗令市民可率先睇到效果，用咗一萬蚊，喺擎天半島售樓處個位置圖上，裝咗個識轉嘅模型仔。而真正嗰個就要明年初先動工，最快都要明年底或06年初先有得玩。摩天輪總高一百零五米，個輪直徑七十五米，有五十二個包廂。聽講到時轉一圈要成十分鐘，有充足時間欣賞維港兩岸景色。
西九龍文娛藝術區係咪應該拆細，引起滿城風雨，睇嚟事件有排都未平息，不過，香港藝術發展局就為呢個項目，舉行三場諮詢會，第一場係為表演藝術工作者同團體而設，已經喺上個禮拜四舉行咗。
第二係畀非表演藝術工作者同團體諮詢，今個禮拜三舉行。
第三場就係為發展商同商界而設，禮拜五舉行，𠵱家事態咁敏感，睇嚟呢場諮詢會都會係最熱鬧嘅一場。
蘭西
電郵地址：
