新車速報：<br>萬事得RX-8轉子引擎顯魅力

新車速報：
萬事得RX-8轉子引擎顯魅力

今年4月下旬，曾經跟香港車迷有一面之緣嘅全新萬事得RX-8跑車，事隔5個月之後，代理首批新車經已陸續運抵香港交客，造型既獨到而鋪排亦予人一新耳目嘅RX-8型號，加上轉子引擎教人難以抗拒嘅魅力，試問又怎可以錯過機會，再一嘗駕駛嘅滋味呢！

記者、攝影：陳偉林　ImageGirl：Cathy

■車頭輪拱兩旁置有散熱柵格，有助引擎得以運轉暢順。

■原廠尾定翼配搭，令高速行車倍見穩壓性。

■尾泵把下附有整流結構，洋溢跑車風采。



萬事得RX-7嘅影子，相信仍在車迷嘅腦海中浮現，然而全新概念設計嘅RX-8，卻教人倍見有一份震撼性。皆因佢用上嶄新外形配搭，尤其係一對覆摺式車門組合，既帶出雙門轎跑車嘅優美輪廓；再者，2+2座位編排嘅後排乘客，進出車廂時重可以有傳統四門轎車嘅方便感呢！

■三幅式真皮跑車軚環把持恰到好處，左邊重附有音響遙控鍵。

■6前速手波，轉檔準確清晰。

賣相獨特難掩霸氣
最教人賞心悅目，莫過於均稱合比例嘅外貌造型，低斜車頭線條匹配高聳車尾組合，溫文爾雅中又不失跑車嘅剛勁美，其中一對頗有神氣嘅Xenon頭燈，配襯響一體式頭泵把連氣霸設計，更顯露出一份辛辣味。相比下，車尾結構亦可謂首尾呼應，加埋四輪大口徑18吋專用胎軨組合，每能令人看得目眩心動㗎！

車廂配搭齊備出眾
至於座艙陳設，前後兩排2+2式四座位，全屬獨立設計，空間闊落之餘，左右兩排之間重縱置有大型手枕分隔，作用係強化車架結構；講到設備，除原廠高級音響連恒溫冷氣外，少不了重有前後獨立照明、儲物匣同杯座組合，以及前後共8個安全氣袋及充氣簾幕保護呢！

轉子引擎表現平均有力
新車用上一台RENESIS(RotaryGenesis)雙轉子引擎，起跑加速唔算好突出，屬順暢嘅線性表現，惟匹配上6前速Close-ratio手動波箱配搭，利用中段澎湃嘅扭力演繹，狠勁一面可謂表露無遺。再者，一套穩紮四輪懸掛設計，剛性中亦帶出柔韌度，加埋多套主動式電子系統，包括DSC、ASC，還有LSD嘅輔助下，對地抓着力豐富又見循迹力強，還有四輪碟煞、ABS連EBD裝置，更令人有收放自如之感呢！

■無B柱嘅水滴形座艙結構，當打開前後車門後，倍見寬敞實用。

■兩排之間以大型手枕貫穿，內附雜物匣及杯座。

■座艙鋪排剛勁又奪目，滲出有濃濃嘅跑車氣燄。

■前排一對桶椅嘅頭枕，重顯現出轉子引擎輪廓。

■中控台配搭齊全，簡潔易用。

■後排之間設有活門直通尾廂。

記者試後評語：全能表現惹人愛
全新RX-8無論包裝及配套，均予人耳目一新之感；250匹輸出嘅雙轉子引擎，反應溫馴有力，表現全無突兀感，絕能顯現出剛強一面，並能令人無法抗拒呢份誘惑呢！

■一台雙轉子引擎，線性演繹威猛又易於駕馭。

Cathy評語：車門編排方便上落
部車個造型好特別又見有個性，尤其係兩邊車門組合，完全打消一般Coupe出入不便嘅問題；座艙鋪排重好特色出眾，後座乘客亦有自我空間㖭！

萬事得RX-8規格
引擎：654cc×2；傳動：6前速手波，後輪驅動
馬力：250ps/8500rpm；扭力：22.0kgm/5500rpm
懸掛：（前）雙搖臂（後）多連桿
制動：（前）透氣碟（後）透氣碟（ABS）
輪胎：225/45R18BridgestonePotenzaRE040
尺碼：4435×1770×1340mm
軸距：2700mm；車重：1310kg
0?00公里：6.8秒；極速：250km/h
新車售價：$399,000
車輛提供：萬事得香港（28931112）

萬事得精品任你揀
若然你除咗對全新萬事得RX-8感興趣之餘，亦想擁有一啲關於萬事得汽車嘅精品的話，就不妨到位於灣仔嘅萬事得Showroom睇睇喇！事關入面有齊各項精品，梗有一款啱你心意；而今日我哋亦揀選咗其中三款精品介紹畀大家，不如𠵱家一齊嚟睇睇。

■Mazdaspeed自動開關雨傘

■Mazdaspped長袖風褸

■RX-8計時機械腕表（德國Sinn限量出品並附有刻上生產編號嘅金屬證書）