第一代XELIBRI搞鬼形象深入民心，西門子更趁住JCShop九龍區旗艦店開幕，一口氣將4部2003年冬季新機，比歐洲更快作首度曝光及提供預訂。四部新機大玩「男左、女右」概念，左派男子組，將背囊扣、Tie夾等概念融入手機之上；右派女子組就硬銷鏈墜、鏡盒等女士恩物，令四部機都變成隨身飾物！
記者：朱崇德、劉耀祥
攝影：Raymond ImageGirl：Irene（Space2）
將生活上日常用品，融入手機設計之上，係今次新一代XELIBRI嘅設計概念，繼承XELIBRI傳統，新一代5、6、7、8號一樣以搞鬼外形、加Fashion飾物設計籠絡人心。新機最大改進之處，係由單色芒年代，昂然踏入4,096色彩芒，而且4部機重有一個共通之處，SIM卡位採用直插式設計，唔使下下拆電咁麻煩。
摺機精神永遠不死，6號為了靚靚，鏡盒設計方便女士們照鏡！攞上手第一個感覺，套句台灣話，真係要用「粉美」嚟形容，圓圓流線型機身，加上只有古銅及銀色機身顏色選擇，未打開已經如一件珠寶首飾！打開摺機就是兩面鏡，一塊圍住個芒，照到眼、口照唔到鼻！可能為咗彌補呢個缺點，KeyPad中間位加多一塊放大鏡，一於畀一眾女士們照個夠。數字鍵盤秉承XELIBRI玩嘢傳統，嚟個「摩西分紅海」──左、右兩邊飛。就實地測試所得，全部掣分得又開又貼邊，想好方便咁一隻手打電話，真係有啲難度。
5號攞上手第一個感覺，可以用好輕又細形容，Size小如兩個火柴盒，僅重74克，加埋個掛鈎扣上身，真係輕細如無物。據原設計師Rankin稱，設計概念來自工作服，基本成部機就有如背囊上一個尼龍帶扣，驟眼睇只係一部好Sharp，藍、黑相間嘅手機，但一Click上個「底扣」，咁就皮帶、背囊全身任你鈎！設計另一獨到之處，係連上「底扣」後，手機主要嘅方向鍵同功能鍵，全部外露，所以唔使掹部機出嚟，都一樣可以照常操作，夠體貼！機身顏色都好潮，分別有藍白同藍黑兩種選擇，襯衫一流！
正面睇7號其貌不揚，除咗有啲圓頭圓面，同一般手機仿似不無兩樣，但當你打側睇，就會發覺機身中間有一大條罅，差唔多將成部手機橫切開來。據知設計概念來自男士嘅呔夾，即係呢條大罅專門畀你攝喺衫袋或褲頭。就筆者實地測試，發覺呢個「呔夾」好夠彈性，當中尤以厚身嘅牛仔褲袋、大外衣袋夾得最穩陣，但如果遇上恤衫一類薄布料，穩陣度始終差啲，難怪乎7號要定位為2003冬季機款。機身顏色選擇有兩種，首選係好似汽車桃木色表板嘅紅色；另一款暗藍色，配搭比較沉實，用嚟襯男士深色西裝褸最一流！
試玩8號真係無所適從，摷勻成部機真係一個數字按鍵都冇，原來佢同上代3號一樣，都係玩聲控撥號，加十字掣選項功能，果然夠前衞！機身設計靈感，來自女士們的珠寶鏈墜，極好手感嘅啤梨形機身，只要加上尊貴嘅金屬吊架同銀鏈，就可以將成部手機倒掛頸項之上，儼如一件珠寶飾物！8號同其他幾部機另一不同之處，佢喺XELIBRI系列中，首部內置有收音機功能嘅手機，再配合埋鏈墜機身設計，功能夠晒Match！
售賣點：JCShop
查詢電話：31015033
地址：九龍尖沙嘴海洋中心商場3樓308室