真係想唔到，本田以一招迅雷不及掩耳嘅手法，捷足先登地推出Facelifted新版嘅Stepwgn八人MPV；當中，至為矚目就梗係首度打入香港市場嘅2.4公升型號啦！據知，呢部加有全車Modulo包圍、又有齊雙趟門同靚靚16吋跑車合金胎軨嘅新車款，矛頭重直指豐田Previa㖭！兩者同屬2.4公升級，但車價就有近5萬蚊差別，昔日本田以Odyssey跟Previa抗衡成績一般，今回以Stepwgn作越級挑戰，成功與否就真係要多睇一會喇！至於另一邊廂嘅豐田Facelifted新版Picnic，亞Mark睇嚟代理會以不變應萬變嘅招數，直至今個月28日，等香港一班汽車傳媒作實地試車後，方會正式登場發售。據知，豐田代理咁胸有成竹，主因係Picnic往績賣得有保證，聽聞今趟引入本地嘅新版，除外形有變外，追加設備重點還有Xenon大燈、自動開關嘅AutoLight同雨滴感應RainSensor㖭！出發點全都擺放響安全性方面。至於車價，傳聞就好吸引喇！標準版Picnic賣19萬8千幾，而頂級版會貴一萬左右，約價為20萬9千多；究竟Stepwgn跟Picnic會鹿死誰手？大家就真係要拭目以待喇！