SCEI能晉身大廠之列，一系列創意Game功不可沒。最新《ChainDive》，就以獨特打鞦韆動作作號召，消滅敵人之餘重要四圍救人，可算係科幻版嘅蜘蛛俠。
記者：徐影龍
《ChainDive》打正旗號玩動作，梗唔可以邊行邊打咁悶。主角夏克憑住左手射出嘅電漿光鏈，連接無數嘅綠晶塊，喺天空中自由自在咁盪嚟盪去，十足十蜘蛛俠咁好Feel。遊戲第一目的除咗不斷消滅敵人外，重要救走人質，最後放喺指定地點先算完成任務。玩家會經常性手忙腳亂，不過呢點亦係《ChainDive》好玩嘅地方。
主角要先近距離按□掣凍結敵人，再按L2掣方做成有效嘅攻擊；只要喺特定時間及唔落地情況下，就可做成連鎖。若遇到大堆敵人，大可用△掣出必殺技，即時凍結畫面上所有敵人，不過有兩點壞處，第一係扣1/3體力，太少HP連必殺技都出唔到；第二就係凍結有效時間非常短，極其量夠你攻下7至8隻敵人，值唔值得就見仁見智喇。
對應機種：PS2
遊戲類型：動作
遊玩人數：1人
開發商：SCEI
售價：$288（行貨）
