美國樂壇小天后BritneySpears最近忙於為下個月推出嘅新碟《InTheZone》宣傳，佢可唔可以翻身就係睇呢張碟，所以Britney搵咗Moby、R.Kelly、Bloodshy&Avant等樂壇猛將助陣，其中最受fans注目嘅，當然係早前同佢公然玩濕吻嘅麥當娜（Madonna）合唱嗰首《MeAgainstTheMusic》啦！
呢排好多娜姐嘅fans都問我羅拉搵唔搵到《MeAgainstTheMusic》嘅MV，似乎大家都好想睇吓娜姐對住Britney有冇更激嘅舉動。上次喺MTV音樂影帶頒獎禮上着黑色衫嘅娜姐，今次以白色衫亮相，而上次着白衫嘅Britney今次就着黑色衫，睇嚟兩個人都係喺個MV入面行行企企，見唔到佢哋有乜出位舉動，不過娜姐喺啲猛男膊頭上面玩騎膊馬，就挽回唔少分數。
其實Britney都知道唔係有娜姐撐住就唔使做，所以佢上個星期五晚喺三個鐘頭內連踩三間夜店，着住bratop大晒身材又唱又跳，不過在場好多記者同fans都好不滿，因為Britney嘅保鑣唔畀人影相，有攝影師重話娜姐唔會咁樣對待佢哋喎！