人氣歌手兼係少男偶像嘅電眼女王，身邊一直有唔少追求者，有傳佢同某巨星都有一手。𠵱家電眼女王嘅事業漸有起色，加上佢間唱片公司嚴禁旗下歌手拍拖，所以電眼女王唔敢同其他男仔出街，何況拍拖？不過同電眼女王一間唱片公司嘅新紮男歌手就食咗豹子膽，唔知係咪諗住肥水不流別人田，竟然夠膽狂追電眼女王，莫非佢想同巨星拗手瓜？
新紮男歌手個樣成個乖仔咁，查實扮豬食老虎㗎咋，講到𠝹女重不知幾叻。佢對女仔好細心同體貼，知道電眼女王係冇車階級，雖則佢本身都冇車，但竟然諗到出動有車嘅姨媽姑姐同埋朋友，借車接載電眼女王，加埋用手機短訊傳情，兩招追女秘方打孖上，所以電眼女王對佢都有啲冧㗎！
新紮歌手用到搵人出車呢招嚟追女就真係幾無敵，但佢咁犯公司嘅「死罪」，又當巨星冇到，若然穿煲嘅話，唔知使唔使入雪櫃呢？
余文樂、鄧健泓同二人男子組合Boy'Z噚日一齊喺元朗出席商台活動，重大玩wargame。
問到樂仔玩wargame時點樣保護自己，樂仔話：「我以前試過俾子彈打中耳仔，結果腫咗幾日，好鬼慘。我今日冇戴護陰，我諗唔會咁唔好彩啩，如果係咪攞支槍放喺下體前面，或者趴低賴死唔走囉。」其實陳冠希都唔喺現場，余文樂都唔需要咁驚俾人射親吖！
台灣藝人林熙蕾最近俾拍到同吳彥祖喺台灣撐枱腳外，又傳佢同元大集團少東馬維辰傳婚訊，佢噚日喺台灣話：「我要不要努力和吳彥祖試着交往，滿足大家的願望？我和馬維辰也不是那麼熟的朋友。」林熙蕾話舒淇曾想撮合佢同吳彥祖，但擦唔出愛火花。如果俾吳彥祖緋聞女友LisaS.知道，唔知會唔會向舒淇問罪呢？
英皇3T嘅劉思惠（Maggie）同蔣雅文（Mandy）噚日喺尖沙嘴為「JCShop」開幕做嘉賓，每人重收到一部手提電話，Maggie話：「今次酬勞好好。」Mandy就話喺度買咗套保齡球玩具，佢話：「喺屋企玩時，唔小心彈高咗個波，重打爛咗盞燈。」Mandy今次幫人宣傳，定幫人倒米呢？
Shine噚日喺鯉魚門出席活動，黃又南自爆日前同朋友玩緊時，唔小心跌咗喺地，佢話：「最慘係我整親條腰，搞到我成晚瞓唔着。」聽講腰對男人好重要，問又南怕唔怕，佢竟反問記者：「點解男人條腰咁重要？」又南咁都唔明，不如返屋企問吓阿爸啦！
