早排唔少玄學家都話股市喺10月會跌，跟住秋官套新電視劇又上演，搞到小初都有多少心驚，但套劇播咗咁耐，暫時都睇唔到對個市有影響，小初喺呢段時間重有多少斬獲㖭。
經紀陳今個星期又話有好介紹，佢問小初記唔記得年初齊齊賺過錢嘅華瀚生物科技（587）？佢話隻股周五公布全年業績，聽講跟住重有動作跟尾，故此可作短炒，叫小初留意吓。
小初記得今年年頭炒藥業股之時，曾經在0.90元水平買過華瀚短炒，叫做執過多少。
華瀚之後跟潮流，在早幾個月前發行過一批可換股債券。根據以往經驗，公司發行呢類債券後，因為持有人見價高可以行使沽貨，所以股價難免受到牽制，華瀚亦唔例外，股價在1.20元水平打橫行一段時間。
經紀陳話，雖然有沽壓存在，但華瀚股價依然頂得住，反映幕後大陸炒家夠實力，由於壓力漸消，加上又傳公司將有搞作，所以近排股價拾級而上，上周五再升6%，收1.41元，可密切留意。
慕容小初