無論係唔係天主教徒，都一定有聽過德蘭修女嘅事迹，呢位曾獲頒授諾貝爾和平獎嘅修女，貢獻大半生喺印度照顧垂死及無家可歸病者，雖然佢歸返天家已經六年，佢嘅高尚情操（呢四個字，用喺德蘭修女身上，係真嘅），仍然留喺好多人心中。適逢今年係教宗若望保祿二世就職二十五周年，教宗早前冊封咗幾名神職人員，表揚佢哋喺傳教工作上嘅貢獻，其中德蘭修女就獲冊封為真福聖人。
香港教區噚日喺香港大球場舉行咗一個名為「祝福串串」嘅盛大慶典，盛況空前，近二萬名教徒一齊以念玫瑰經方式，歌頌教宗同德蘭修女對教會嘅貢獻。香港教區主教陳日君更指出，神職人員離鄉別井到遙遠陌生嘅環境，一切都為傳揚福音。德蘭修女封為真福聖人，毫無爭議，頒紫荊勳章，年年都有驚慄效果嘅特區政府係咪要吸收下經驗呢？
（圖）近二萬名天主教徒一齊念玫瑰經同高舉彩帽，歌頌教宗同德蘭修女對教會嘅貢獻。
張家俊攝
傳真︰2623-9278
電郵︰