「維港巨星匯」笑話陸續出籠，有讀者投訴，話買咗貴飛，坐喺第七八行，都睇唔到「巨星」風采，因為前面啲鬼佬個個企晒起身，肥屍大隻，擋住視線，兼重有好多買咗平飛嘅觀眾，喺後面飛天坐咗上嚟，買平飛、坐貴位，買貴飛嘅，鬼佬背脊就有得睇。
上次皇馬隊表演賽，足總賣飛，扣住好多，送畀官紳友好，搞到球迷日曬雨淋排隊；今次維港巨星匯演，慘到要通街派飛幾千張，都冇人幫襯。咁多人揸贈券入場，又點對得住買咗貴飛嘅個啲？
八千萬港元振興經濟，做咗羊牯，兼失禮全世界。辦理權又裏通外國，喪權辱國咁任由美國商會話晒事，阿董一度打電話畀美國商會主席詹康信，不過原來唔係據理力爭、挾神舟五號升天成功嘅民族豪情，向詹康信拍枱拍櫈，警告佢唔好欺負特區嘅中國人民，而係向鬼佬詹「致謝」，真係傷晒中國人民嘅感情！大好維港河山，遭到盧維思及詹康信宰割，呢個特區政府，豈不是腐敗過清廷？
立法會應該效法調查沙士咁，成立一個「維港大好河山宰割滙獨立調查委員會」，調查下列疑問：
一，點解有咁多免費飛亂派，買咗飛嘅，點樣向政府要求回水，以便做到「人人睇免費，平等最實際」。
二，滾石樂隊，塘魚滾海水，收咗四千萬，呢條數點計，究竟有冇人收咗回佣。
三，特區政府話「維港匯」吸引遊客，催谷旅遊經濟。立法會應委託調查公司計吓數，睇吓有幾多珠海東莞上海北京嘅自由行旅行團，包括落嚟掃珠寶玉器、執紙皮拾荒嘅北嫂同埋阿婆，連同好多趁勢跟團湧落嚟，喺鬧市磕頭，用個口拉二胡、冇手缺腳嘅乞兒，買咗飛幫襯去睇滾石大騷，利用呢個千載難逢嘅機會，與國際接軌，見識吓先進生產力同埋先進文化？若果唔係，「維港巨星匯」就變咗水魚大雜燴，Prince同滾石變咗國際性扑頭黨走嚟亞洲專同啲賣國嘅政權合作，劫掠當地人財富，國家冇晒面子，阿董班子又冇晒主權，點樣對得住上太空打咗幾個圈、暈陀陀咁落返嚟嘅民族英雄楊利偉？
傳真︰2623-9278
電郵︰