Ubi都稱得上係第一身射擊Game能手，去年嘅《SplinterCell》、《RainbowsSix3》隻隻都賣到滿堂紅，不過今次嚟個小突破，居然用《UnrealII》嘅3D引擎，開發一隻漫畫風格嘅槍Game《XIII》。畫面Cutie、槍戰血腥，最正係下下到肉，打到「BAOOMM!BAOOMM!」聲，唔話你聽係打機，重以為自己睇緊3D漫畫㖭！
記者：朱崇德
所謂十三不祥，好好哋一隻Game為乜改個名叫《XIII》？原來佢是由法國一本同名暢銷漫畫改編而成，所以好刻意同一般槍Game唔同，直頭將遊戲畫面做到漫畫一樣！好破格！
遊戲故事改編自原著漫畫的頭5輯，玩家一擘大眼，就發現置身美國新澤西一海灘上，不過對以往記憶甚至自己個名，都忘得一乾二淨，唯一頸上有個「XIII」的紋身同一條保險箱鎖匙，在破解身世過程中，竟發現自己同刺殺總統事件有關，從此就受到FBI追緝及黑白兩道追殺！
遊戲由8個版圖、37個任務組成，特別之處是遊戲場景及人設，使用強烈陰影對比嘅繪畫筆觸，好有漫畫Feel！驟眼睇可能誤以為「2D遊戲」，其實骨子裏係《UnrealII》引擎開發嘅3D遊戲。
筆者試玩時，覺得最過癮係遊戲畫面成日出現「形聲」英文字，好似敵人行過會有「TapTap」聲嘅字、爆炸會有「BAOOMM!」等效果字，須知主角在遊戲所有動作，都經過原作者WilliamVance及JeanVanHamme詳細修正，所以原著漫畫風味十足！
遊戲AI亦值一讚，敵人經常開槍牽制你，嗰頭搵掩護物，轉頭請你食「菠蘿」，難度尚算中等。不過玩家裝備亦好強，常規武器約15種，好似雙曲尺、狙擊槍、散彈槍等，而且開槍反應幾好，不過筆者認為遊戲重點反而係非常規武器，譬如大家隨手執到嘅玻璃樽、鐵鏟、煙灰缸、櫈及滅火筒等，不過最離譜，係敵人屍體竟然可當人盾幫你擋子彈，重勁過星爺嘅七武器！
搞鬼武器大集會
暫時知到《XIII》會推出PC、XBOX、PS2及GameCube多個版本，但據代理表示，相信GC版未必會有行貨返。除單機模式外，據知遊戲還會加入多人模式，好似Deathmatch、CTF、TeamDeathmatch就當然唔少得；另外網上流傳，遊戲內還會多一個任意破壞嘅「Sabotage模式」，和以Sniper身份保護隊友嘅「CoverMe模式」，但由於香港XBOXLIVE！未有下文，所以多人模式將會係PC優先試玩！此外，外國有Game網站話《XIII》最多可支援32人同時對打，相信一出，網吧一定打到癲！
遊戲平台：PS2、GC、XBOX、Windows
遊戲類型：第一身射擊
開發商：UbiSoft
行貨發售日期：
PC版 10月28日（$250）
XBOX版 11月6日（$299）
PS2版 （未定）
