新車速報：<br>豐田Harrier2.4AeroTourer加包圍顯個性

新車速報：
豐田Harrier2.4AeroTourer加包圍顯個性

凌志RX300熱賣不乏捧場客支持，連帶東瀛本土版嘅Harrier亦備受追捧，當中除至頂級嘅3.0公升版本外，屬入門版嘅2.4公升型號，匹配前輪驅動裝置，亦好啱日常代步用呢！最近，有入口商引入咗一款加有AeroKit嘅Harrier2.4AeroTourer抵港，不但包裝出眾之餘，車廂陳設重好豪華講究呢！

記者、攝影：李勤

■換新裝頭泵把連大型氣霸，突出又見剛勁美。

■炯炯有神嘅Xenon大燈，凝聚有一份誘人魅力。

■兩邊車身加有裙腳包裝，予人靠貼路面嘅可靠感。

■兩邊門鏡加有方向指揮燈，既奪目又吸引。

■車尾一體式泵把亦附有整流設計，別具動感。

■車頂加有尾定翼連High-mount煞車燈，帶來多一份穩妥感。



豐田車款眾多配搭夠全面，一直廣受香港車迷支持，由於近年汽車市場吹起一陣CitySUV風潮，有唔少揸開四門轎車嘅用家亦一嘗新滋味，買番部擁有一身SUVLook嘅車款作代步用，貪佢個子高大威武，坐得又舒服嘛！

■三個獨立液晶體圓表裝置，資料豐富又悅目。

■一套4前速半自動波，別具手波車嘅好玩一面。

■表板旁有齊門邊電鏡等按掣，大有觸手可及嘅方便。



包裝討好有朝氣感
響眾多車款當中，豐田Harrier可算係一部普及又出眾嘅款式，而新近引入嘅AeroTourer版本，唔單止車身前後加有原廠大包圍，還有兩邊裙腳修飾；再者，四輪17吋跑車合金胎軨配搭，以及一對望落頗有神氣嘅Xenon車燈組合，單係呢身裝扮，既富朝氣之餘，重見有剛勁嘅吸引魅力呢！

■前後兩排高級皮椅，貼身又見承托力外，駕駛席另備有多種調校選擇。

■整個座艙烘托得豪邁又吸引之餘，重有大車一份寬敞觀感。



座艙講究氣派盎然
至於車廂陳設，前後兩排高級雙色皮椅不在話下，座艙四周重有瑰麗桃木修飾，就連軚環都屬意係半皮半桃木鑲嵌，坐得愜意之餘，重見氣派十足。再者，尾排重可以左右獨立收摺放平，令尾廂容量倍增；其次，幾近天幕式嘅玻璃車頂，加上高級CD音響、恒溫冷氣及前後獨立照明裝置，都可算係一應俱全㖭！

■前排之間特備有大型儲物櫃，少不了重有杯座裝置。

■天幕式玻璃車頂配搭，遠超一般轎車所及。



2.4公升VVT-i偈演繹有力
個子高大嘅Harrier，用上一台2.4公升直4偈驅動，看似力有不及；但呢台偈附有VVT-i設計，輸出平均好力之餘，佢重採用前輪驅動結構，加上一套4前速半自動波，起跑加速全沒有半點乏力感。再者，柔韌富支持力嘅四輪懸掛，行車平穩暢順，重有不錯嘅走彎循迹力呢！

■尾排可完全收摺放平，地台下更備有雜物匣，擺放雜物倍見方便。

■一體式中控台既有原廠恒溫冷氣，又有至In嘅大面板高級CD音響，享受至出眾。

記者評語：全車包圍富吸引力
部車加入咗原廠包圍及多項配件，變得動感非常之餘，車廂亦追加有不少桃木修飾，氣派直逼高級轎車，加上出眾嘅性能表現同乘坐感，絕對係一部不錯嘅CitySUV好選擇。

豐田Harrier2.4AeroTourer小檔案
引擎：2362cc直4DOHC
馬力：160ps/5600rpm
扭力：22.5kgm/4000rpm
傳動：4前速半自動波，前輪驅動
尺碼：4730×1845×1680mm
軸距：2715mm
車重：1600kg
新車售價：$279,000（標準版）
車輛提供：富利堡汽車（28776700）

■新車一台2.4公升引擎輸出平均，兼且運轉寧靜又慳油。