當大家都誤以為劉燁與鄭伊健同時愛上林嘉欣的時候，這段三角戀終有突破的缺口，嘉欣坦言在拍攝電影《戀之風景》時已愛上劉燁，其間更有十多日極度失落，雖然最終成功抽身，卻將感情埋在心底，沒有對身邊人透露半句，她更坦言甘願為愛情放棄事業。
林嘉欣與劉燁、鄭伊健合作電影《戀之風景》，分別與兩位男主角傳出緋聞，究竟是真有其事，抑或純是宣傳伎倆？嘉欣歎一口氣說：「或者因為我平時冇乜緋聞，來來去去都係肥瘦問題，所以就將目標轉到男對手身上，同伊健傳，大家只會覺得好笑，唔當一件事，好彩佢唔會嬲。」
但與劉燁合作，嘉欣坦言曾帶來痛苦，從睇劇本的一刻開始，就得說服自己好喜歡對方，將對方的優點放大，到最後不知不覺愛上了他，嘉欣憶述戀上劉燁的經過說：「喺青島拍完外景返嚟，頭十幾日好失落，唔想出街、唔想打電話畀任何人，以為自己鍾意咗佢（劉燁），但其實又唔係喎！我冇將呢份感情講出嚟，係因為我好清楚呢一切不過係假象，所以冇講畀任何人聽。」
戲內的感情生活多姿多采，現實中的感情卻還未有着落，嘉欣以一貫熟練口脗說：「感情，放埋咗一邊啦！真係睇得好淡，朋友係要識先有，但呢個階段只想專注自己，唔想再煩多一件事，我只可以投入做一件事，如果鍾意多一個人，我會好內疚。」
嘉欣續說：「好似我喺台灣養嘅一隻四歲大嘅狗，我因為要嚟香港，將隻狗放喺朋友度寄養，為呢件事喊過好多次，覺得係自己將隻狗拋棄咗，亦因為咁樣，我同自己講以後都唔再養狗，好難講有一日唔會為咗鍾意嘅人放棄事業，我都算係一個即興嘅人。」
撰文：陳月萍
攝影：仇志德
化妝：DephineChan
髮型：KenjiNgofIlColpo
服裝：ZtampZ
場地：赤柱露台餐廳
