國家副主席曾慶紅訪問澳門，大讚澳門特首何厚鏵施政有效，令澳門回歸後社會安定，經濟持續增長，人民安居樂業。咁讚法，自然又令人將何厚鏵同我哋嘅阿董比較。賭王何鴻燊噚日同曾副主會面後，就有傳媒問佢，將何特首同董特首比較，後者係咪做得唔好呢？
本來呢個係政治敏感題目，但賭王就一於見招拆招，佢話何厚鏵其實比董建華着數，「佢（何厚鏵）正所謂喺澳門長大，雖然曾出國讀書，但澳門得四十幾萬人，佢識咗八成，八成人當然支持佢啦。反觀阿董，香港有成七百萬人，阿董以前做船（航運業），佢又點識咁多人呢？呢點何特首有啲着數。」
賭王又話，澳門地方比較細，管理亦較容易。據澳門嘅傳媒行家演繹賭王呢番話，認為賭王咁講，係想「暗寸」阿董唔夠親民。
賭王再嚟一招「明寸」：「我唔係話阿董唔好嘢，我亦對阿董有信心，我相信呢啲困難，一路一路好易克服，講到尾，最緊要有信心；嗱，呢度（澳門）嘅市民個個對特首有信心，所以立法會開會，冚崩冷遞手，冇乜邊個反對，香港就唔同喇。」擺明係寸香港嘅立法會議員啦。
（圖）曾慶紅（右二）噚日喺何厚鏵（右一）、賭王同何超瓊帶領下參觀澳門旅遊塔。澳門新聞局圖片
傳真︰2623-9278
電郵︰