男子組合嘅成員猩猩王，一向𠝹女成性，可能佢讀書唔多，家境又比較複雜，佢份人其實好冇自信，所以惟有恃靚行兇，以不停𠝹女嚟搵番佢嘅信心。
猩猩王今年年頭重住喺九龍平民區，但成條街嘅靚女，都幾乎同佢拍過拖，有位新紮豔星以前同佢係街坊，亦都同佢都有段霧水情緣，但後來猩猩王受公司力捧，佢就即刻同豔星分手，聽聞豔星對佢就一往情深，但猩猩王對佢呼之則來，揮之則去，豔星因為咁而大受打擊，所以先至走去行性感。
猩猩王飛起豔星後，初頭就扮晒乖，好似好專注事業咁，實際上隔唔夠兩個月，佢又流露𠝹女本性，佢因為成日上電視台嘅音樂節目，而同一位做主持嘅新紮女藝員搭上，不過佢一路都好驚穿煲，萬一俾唱片公司知道嘅話，佢就一定入硬雪櫃，所以佢早排又同女主持分咗手啦。
其實後生仔拍吓拖本來就好平常，但好似猩猩王咁用情不專，又花心但又驚影響事業，睇怕佢上得山多終遇虎，遲早都會出事。
噚日黃伊汶同馬詩慧喺銅鑼灣時代廣場出席港台活動，早前有報道話佢問候陳慧嫻病情時，被對方寸，佢就解釋係一場誤會，因為佢真係好耐冇見過慧嫻，而佢亦都唔覺對方寸佢，但黃伊汶又承認慧嫻有咁講過，咁即係唔係誤會啦，下次佢問候前輩，怕且都要慎言啦。另外馬詩慧帶埋仔女出席，點知一班E-Kids嘅歌迷一見到偶像就不停大嗌，搞到馬詩慧要用手揞住個仔嘅耳仔，佢忍唔住話：「都唔知佢哋喺度做乜？」佢重話佢啲仔女一定唔會咁樣。
何韻詩前晚喺尖沙嘴舉行火紅火熱音樂集會，阿詩講開佢有份拍嘅電影《豪情》，佢爆Eason同班裸女拍完戲後，好雀躍咁四圍同啲老友講拍戲情況。而阿詩喺戲裏面只露大髀，亦有場同陳奕迅嘅床戲，問佢咁Eason有冇反應，阿詩就話：「可能我質素高啦，所以佢冇反應。」呢句說話唔知係踩Eason定係踩佢自己呢？。
方力申（Alex）噚日出現喺銅鑼灣時代廣場，為Reebok挑戰賽記者會做嘉賓，Alex一向同呢個牌子嘅關係好好，佢做運動員嘅時候已經贊助佢，入咗行之後重做埋代言人，Alex話：「佢哋遲啲重想話買斷我，贊助我成世。」如果Reebok真係包起Alex，到時佢就唔可以再着其他運動牌子嘅衫嘞！唔知Reebok有冇出內褲呢？
胡杏兒、蘇玉華同李龍等人噚日去到何文田廣場，為舞台劇《寒江釣雪》舉行簽名會。胡杏兒話喺呢套舞台劇入面佢會飾演一個做第三者嘅歌女，所以到時都要一展佢嘅歌喉。不過，杏兒就話好擔心唔夠時間綵排，因為自己都忙緊拍電視劇。杏兒話雖然做過咁多劇集，未試過民初造型，但係喺舞台劇就可以一試，所以佢覺得好開心。
黎瑞恩生完BB女後，一直都話佢想追番個仔，日前傳出佢再次懷孕嘅消息，前日小恩子去到深圳觀瀾湖出席高爾夫球慈善賽，睇來重未收身，但佢對自己再次有孕嘅消息感到可笑，小恩子話：「生完嗰個，冇可能再大肚住，何況有咗都唔會上嚟打波啦，但我都希望遲啲會追多個，仔女都冇所謂，我鍾意人多熱鬧。」咁老套啲講句，生夠一隊足球隊都好喎。
