早前，我哋曾經同大家披露過，話本田代理快將推出全新Facelifted新版嘅Stepwgn，惟近期市場競爭激烈，為要搶先對手爭取買家，日前剛運抵香港嘅新版Stepwgn，昨日經已率先響屯門車展上亮相。由於新車數量有限，故未能同時間響各大陳列室展出，若然各位準買家，又或者係本田Fans的話，就要親身到屯門一趟，方有機會近距離接觸部車喇！
然而，你哋抽唔到時間的話都唔緊要，事關我哋嘅特派記者，昨晨經已一早響屯門恭候部新版本田Stepwgn，而為首亮相嘅一部，重係首次在港販賣嘅2.4公升型號；雖然馬力輸出數值，跟原有2.0版本相若，為162ps/6000rpm，但扭力卻調升至22.4kgm/3600rpm，並配有全新5前速自動波箱。其次，屬頂級版2.4公升型號，重有全車原廠Modulo包圍、新增兩邊車身裙腳、高置尾翼及16吋跑車合金胎軨，當然唔少得重有雙趟門跟左邊全自動開關設計啦！至於座艙陳設，新車中排採用足尺碼嘅新座席配搭，既有全新表板及中控台組合外，新車重追加有冷凍櫃，好啱響炎夏擺放消暑嘅飲品㗎！加埋一套10碟CD高級音響，新車價不過係24萬6千8，而2.0公升新版亦只係19萬9千8。響日圓高企下重可以Set到咁超值嘅價錢，真係要買趁快喇！