集集都炒得起嘅《惡魔城》系列，下個月27號就輪到喺PS2上殺吸血鬼，而今集就會由平面2D改為3D形式出現，前排有睇本報介紹，相信都知有幾正，當然一如以往廠商就更會出隻限定版撐吓場。上次隻Game喺GBA上送本限定插畫書仔，炒到上四百幾蚊，今次除咗大大盒兼送小島文美插畫書、再加PostCard同CDSingle，務求要你唔買唔安樂，不過可惜今次行貨只得普通版，限定版日本連SONY同KONAMI網站都預訂都滿額。限定版定價8,800日圓（約港幣$624），相信到時輕易炒到過千蚊。
今年日本大作爭霸由下個月尾開始，但係美國其實10月已經陸續有唔少大作推出，好似PC上嘅《MaxPayne2》，PS2嘅《NBALIVE2004》都己經推出，不過論最期待嘅就梗係《FFX-2》啦，隻Game日版初出時好多人唔識日文，個個玩到一頭煙，幸好美版下月18號推出，相信有唔少人會買返再玩多次。
前排比XBOX扒過咗頭做包尾嘅GC，計遊戲質素就第一嘅任天堂終於將GC降價。美國單機就賣99美元，即係800港元有找，對比目前普遍賣緊過千蚊嘅價位，的確幾吸引。據外地消息稱，GC銷量即時勁升四倍，而日本方面就會降到14,000日圓（約港幣$994），兼送埋記憶卡。