入行短短兩年的林嘉欣，甫起步拍了一部電影《男人四十》，便同時榮獲金像獎及金馬獎最佳女配角及新演員獎，一直發展順利，夥拍的都是當紅男演員，如張學友、張國榮、劉燁和鄭伊健等，人人都說她幸運，就連她自己也覺得獲幸運之神眷顧，亦因為首部電影的成功，令最初對自己許下的承諾亦無法兌現。
嘉欣坦言：「入行拍戲到攞獎，都係意想不到，本來諗住拍完《男人四十》就走（離開娛樂圈），𠵱家梗係冇諗住走啦！不過之後有段時間都試過冇乜嘢做，所以我亦唔會抱太大期望，順其自然。」
發展順利，但嘉欣慶幸從未迷失，她說：「當你發展得唔錯，讚一個人其實好容易，但我好感激身邊人畀我誠意嘅批評，對我奉承係冇用㗎。我知道自己嘅優點同缺點，當有人連我嘅缺點都讚嘅時候，就知有啲人係唔可信，我冇迷失過自己。」
嘉欣被指拍的每部戲都是星皓經理人公司投資，加上又有與老闆王海峰的緋聞，因此認定她只是得老闆的照顧，嘉欣坦言：「其實由我拍第一部電影，到𠵱家呢部《戀之風景》，每次都經過好嚴格嘅試鏡，導演覺得適合至搵我。」
對於演戲，嘉欣自覺優勝的地方是夠自然，全因生活夠簡單，她說：「我鍾意寫實戲，就因生活每日都過，人哋話人生經歷豐富對演戲有幫助，但唔代表我要日日去蒲。
「我係一個好悶嘅人，但我好享受，平日生活應該有自己空間，所以我會一個人去行街睇戲，我認我係『獨孤村』，生活圈子好細，每個演員都有唔同性格同生活習慣，唔可以用一個方法對付所有人，所有事都要令自己舒服。」
