上個禮拜喺地產同銀行股雙重發功下，恒指終於升上去12000點樓上，喺各路資金追捧下，個市應該重有得升，即係話入市短炒重係時候。
喺呢個升市中，班大戶仍非常眷戀中字派股份，早前有唔少資金喺高位甩咗貨，𠵱家個市升到咁盡，既然啲國企無乜利淡消息，班炒家無理由會咁執輸。老友叫伏勝不如多啲睇國企股好過，重特別點名話要留意哈爾濱動力（1133），據講哈動上季定單增加咗唔少，喺國內電網迅速發展下，可以帶動哈動核心業務高速增長。
雖然話呢個暫時重係個概念，但有朝一日真係「夢想成真」嘅話，相信個價翻一番亦唔出奇。哈動股價上個禮拜去到兩蚊有些少阻力，收市價企喺1.96元，如果可以突破兩蚊呢個水平，真係唔講得笑。
另外，呢排唔知係唔係個市真係錢多過頭，喺啲公司連番批股同埋咁多新股上市下，新股嘅表現都重係咁好，顯示出有唔少資金仍然鍾情於新股，可能係貪佢哋嘅貨源夠晒集中。就好似隻上市唔夠兩個禮拜嘅北泰創業（2339）咁，佢哋喺上市「籌旗」嘅時候，9成係批畀班大戶，只有1成公開發售，就因為貨源集中嘅關係，上個禮拜就一口氣衝到上1.87元水平，有行家話呢隻股嘅走勢十足十之前隻聯華超市（980）咁，耐力同爆炸力都非常唔錯，值得一睇。呢隻股仔嘅PE只係得8倍，如果班大戶用汽車股嘅PE咁炒佢，分分鐘去到2.5元都重有水位。
伏勝