中國第一位太空人楊利偉於十月十六日上午六時三十五分回返地球，與溫家寶總理通話，正式宣佈凱旋歸來。十點左右，左丁山喺皇后戲院附近，收到一張報紙號外，就係《文匯報》。《文匯報》總編輯王伯遙對電台講，佢哋寫呢單新聞，籌備咗一年，打開咗廣泛網絡，唔怪得佢哋啲料快而準也。
神舟五號回來，凡中國人都高興，電台報道當日早上香港公務員團體在北京見唐家璇，唐先生話覺得好高興，反問一句：「難道你不高興嗎？」呢位先生做慣外長，大概性好辯，鍾意窒吓人，咁樣講法，啲香港公務員點答呀？跟住就講到公務員保持政治中立，係英國人嘅做法，言下之意，唔使畫出腸嘞，效法葉劉淑儀就有官升！
返到寫字樓，公關大姐就嚟電話：「嘩，高興到幾乎喊呀，見到楊利偉返到嚟，好感動。不過睇電視轉播，我嘅職業病又發作。唔彈吓唔得。楊利偉落地後俾咁多人包圍，腳步浮浮，好似耳水唔平衡咁款，睇嚟係重未立即適應地心吸力。公關包裝應該好啲吖，救護人員應該第一時間送楊利偉入醫護車，半小時後等佢適應番地球狀況，先至准電視攝影，等佢表現出一個英姿颯颯嘅英雄形象。橫掂佢升空時都唔准直播喇，有乜好理由佢落番地，未企得穩，暈陀陀咁就要佢上鏡？上面識技術，唔識公關包裝，激死人。」公關大姐觀察力敏銳，佩服佩服！