林嘉欣的父母、姊姊及兩個妹妹均在加拿大生活，談及她的家人，嘉欣臉上泛起絲絲暖意，她輕快地說：「一個『好』字就可以形容晒，我好愛佢哋，可以為佢哋玩笨豬跳、吞火、食蟲，好肉麻嘅說話都會講，我成日同屋企人講我好愛、好掛住佢哋，我平時冇乜脾氣，但如果有人傷害我屋企人，我會同佢哋死過。
「其實以前我唔識得珍惜，喺加拿大讀書時，曾經對屋企人好衰，到出嚟做嘢受過挫折，發覺屋企人對我隨時都係打開雙手，𠵱家我哋關係好好。」
嘉欣續說：「我媽咪唔識用電腦，但佢為咗同我哋四姊妹聯絡，學識email，用兩個幾鐘頭只係打到一小段字，見到之後令我好感動，佢真係一個好堅強嘅媽咪。」
嘉欣十分期待妹妹明年的畢業禮，到時一家人就可以在加拿大聚首，說到妹妹，嘉欣遺憾地說：「𠵱家佢已經高中畢業，識埋男朋友，我一年返去一次只係見一個星期，咁多年都冇喺佢哋身邊，我好感激屋企人從來冇問我工作，只會信任我。」
林嘉欣入行以來，圍繞她的新聞除了關於事業及緋聞外，便是她的身形，一向帶點babyfat的她，雖然有纖體公司助她瘦身，但亦給人一種豐滿的感覺，但她不諱言自己是有努力減肥，亦覺得減得有成績，正如她說：「早兩日睇報紙，佢哋用苗條嚟形容我，嗰一刻我好感動，因為由始至終都冇人同我講過我瘦身成功，我直情想即刻剪低段新聞，裱起佢好好保存，警惕自己！」