啱啱升咗職嘅信和營業總經理韓家輝，唔少人戥佢高興，同佢慶祝一番。中原執行董事陳永傑，噚日就送咗架玩具火箭畀佢，寓意步步高升。雖然係件玩具，唔會飛上外太空，但就夠晒心思。架火箭會發聲，有幾個國家語言選擇，就同識得數國語言嘅韓家輝不謀而合。
另一樣值得高興嘅係，陳永傑話，中原前日（即星期四）錄得超過四百萬元佣金，係今個月平日嘅新高紀錄。一般嚟講，唔係假期嘅時候，單日最多只得二百多萬佣金，前日就多一倍。
陳永傑話，上個月都試過單日錄得咁高嘅佣金，今個月又冧莊，反映市道持續向好。二手業主唔大幅反價嘅話，成交會增加，連同一手盤保持銷量，估計今個禮拜六同日，乘住深化措施效應，有六百萬佣金落袋。
貝沙灣銷情理想，但發展商喺宣傳推廣方面，一直都冇鬆懈，而且形式重好多元化，為凸顯樓盤重視生活藝術，最近重贊助香港歌劇院成立誌慶籌款音樂會，重係主要贊助商㖭。
呢個「愛˙香港˙歌劇」音樂會，今日舉行，聽講係貝沙灣第一個贊助嘅大型公眾藝術活動。睇嚟發展商日後賣樓，宣傳推廣活動真係要無所不包至得嘞。
請咗唔少巨星嚟港表演嘅「維港巨星匯」，噚日開始演出。地產界唔少人都去欣賞呢個Show。九龍倉助理董事黃光耀，除送門券畀旗下樓盤買家外，自己都準備去睇下個月1號Santana嗰場表演，中原陳永傑都話想去。
據知，中原黃埔土瓜灣助理營業董事王鎮維，噚日就請咗批有表現嘅員工，去睇第一場Prince嘅表演。至於，九龍區董事一姐（劉瑛琳）就話，想睇嘅歌手都冇嚟，例如天后級嘅Macdonna同著名男高音巴伐洛提，打動唔到佢喎。
深圳上步國企大廈一樓商場來港招商，發展商派出清一色六名女將，出席噚日舉行嘅記者會。項目代理金豐易居．鴻運國際行政總裁田國強，喺開場時打趣咁講，見到發展商代表係全女班，不禁諗起當今女士地位超然，足頂半邊天!
主持記者會嘅三名女將，係發展商深圳市國際企業股份有限公司董事總經理宋勝軍（圖二左三），旗下子公司深圳融發投資有限公司副總經理蔡少容（圖二左二），同埋管理公司深圳市國際商場副總經理胡志華（圖二左一），當真巾幗不讓鬚眉。
蘭西
電郵地址：