遊大澳，來個上山下海之旅。
坐艇遊水鄉，穿梭於縱橫交錯的水道看棚屋，指定節目；全面點，登象山，尋嶼北界碑，高處看寶珠潭，Beatrice問：「重有呢？」Cookie答：「重有個寸神。」「乜神得幾寸高呀？」「寸人個寸呀。」「有幾寸呀？」「等陣你咪知囉……」
記者：陳漢榮
攝影：陳盛臣
模特兒：Beatrice、Cookie（RichStrategy）
沒有橫水渡，換了可開合的鐵橋，同樣成為大澳的標誌。
鐵橋下停泊了一艘艘快艇，漁民正忙着兜售剛捕獲的海鮮，在討生活：「魚蝦蟹樣樣齊，計平啲畀埋你。」Beatrice也很忙，忙着討價還價：「半斤花蟹，半斤海蝦，計平啲啦……」Cookie嫌她煩，一把拉着她，跳上觀光艇：「夠鐘上船睇棚屋喇，前世未食過海鮮咩？」艇主叫小張，喜與人聊天：「即捕即賣海上鮮，真係難食啲囉！呢度世世代代蜑家人，話海鮮就係海鮮，蜑家人唔會用隔夜貨呃人嘅。」
大澳彈丸之地，已有4間過百年古廟。
Beatrice踏入門檻，說：「個寸神原來係關帝呀，關公一身正氣，幾時變得咁寸？」吉慶後街的關帝廟，供奉的當然是關雲長，但關公不是今次的主角，Cookie指着一個凶神惡煞的神像說：「係佢呀，豎起中指問候你喎，你話寸唔寸嘞？」確實很寸，問廟祝何許神也，她冷漠地說：「雷神！」答得也很寸；再問此廟有多少年歷史，她態度依然：「嗰邊有碑文，自己睇。」據碑文記載，此廟建於1488年，有511年歷史，最後1次重修在咸豐2年，廟內銅鐘、牌扁、鑼鼓全是過百年古物。
Beatrice問：「你估大澳有幾多年歷史呢？」Cookie搖頭，連小張也不曉答。
談歷史，漢代大澳已有人聚居，有文獻稽考的，則上溯至宋代，當時的大澳已是有規模的漁港，漁民多來自深圳、東莞、寶安及惠州，他們開支散葉，建立起番鬼塘村、梁屋村、橫坑村，廣東水師曾派兵駐守這些最早期村落；明末，行「散離」政策，曾迫令中國沿岸50里居民內遷，不願內遷者悉數湧入大澳，吉慶後街因此而成；至清，永安街、太平街、一涌、二涌、三涌相繼出現，人多地少的關係，蜑家人惟有住在水中央，用木頭搭建「葵棚屋」，漸演變成現在「香港威尼斯」了。
寶珠潭附近的楊侯古廟，亦值一遊。
「咪又係廟一間？又有乜好睇呀？」Beatrice環顧廟內裝潢，確實如一般廟宇大同小異，但就忽略了擱在牆邊的一堆大骨，Cookie說：「拜靈骨啦，保平安㗎。」此骨是百年前一條在寶珠潭擱淺的大魚脊骨，是何種魚、魚有多大，已無從稽考，自村民把魚骨移入廟供奉後，寶珠潭再無漁船失事：「村民認為條魚幫佢哋擋煞，咪當堆骨神咁拜囉。」「明白，不過話時話，你估條魚有幾大？」「一節骨都粗過你同我條腰，大到估唔到嗰隻啦。」
穿吉慶後街，過新基大橋，上象山。
全程石級路，易走，但Beatrice還是香汗淋漓：「重有幾耐先到？乜碑咁巴閉呀？」Cookie夠腳骨力，面不紅，氣不喘：「信我！30分鐘即到，個碑一啲都唔巴閉，重好卑恭屈膝㖭，你我要受殖民地統治，都係多得呢塊碑咋。」此碑於1902年建造，至今有101年歷史，呈長方形，矗立在象山西麓，與狗嶺涌上的嶼南界碑相對，用以作為當年清政租借「新界」的界線標誌，基座有刻文，標明所在位置，即東經113度52分。
大澳除了海鮮，出名的還有海味乾貨。
「呢期啲花膠最靚。」Cookie帶Beatrice到永安街的全記，一心掃貨，但花膠賣價最貴1斤$1,400，二人買不起，哭着臉回頭走之時，老闆娘推介即食蝦膏：「近年產品，即食又得，放湯煮公仔麵又得，夾麵包食都得。」試味有感：「色香味俱全！」總算不用空手而回。
東涌市中心乘11號巴士，大澳總站下車。
全記海味
地址：大澳永安街地下87至89號(29856565)
得鴻旅遊(提供觀光艇服務)
地址：鐵橋附近(小張：96898669)
