大市牛皮靠穩，恒指守穩萬二關收市，微升16點。如此市況，表現突出嘅藍籌唔多，弱勢兼落後嘅電盈（008）係其中之一，是日大升5.5%，收報5.75元，成交逾1.1億股，好熱鬧。
正股發威，電盈Call輪自然意氣風發，10大升輪當中，佢哋佔6件。最叻嗰件9766狂升1倍，由31.5仙飛上63仙，唔係乾升，昨日逾億份易手，銀碼5629萬元，大過好多股票。
9766係末日輪，下月10日到期，溢價2.3%，槓桿率9.1倍，數據不過不失。睇好電盈又唔想玩末日輪，可以考慮早幾日推介嘅9791，呢件昨升20%，啱啱躋身10大，現價1.41元，明年3月18日到期，溢價2.8%依然吸引，缺點係槓桿率4.1倍，爆炸力稍嫌不足。
電盈已升破6月高位5.65元，照計唔會咁快腳軟，𠵱家買9791應該重有水位。
是日威水輪有件品質公司輪609，受正股（243）急升12%帶動，609大升36%。不過呢隻輪玩唔過，現價4.9仙，明年1月28日屆滿，溢價115%，槓桿率大都冇用。𠵱家買609，要望正股喺3個幾月內大升1.15倍，先至唔使輸，如果眼光真係咁準，估到正股有咁叻，點解唔直接揸正股？
章盛