經紀黃周三講過，捧新昌管理（2340）場或者有驚喜，隻股噚日突然發難，大升10.13%，收0.87元，成交金額增至1637萬元。
小初炒股冇耐性，當然雞咁腳沽貨獲利，但經紀黃就話小初太心急，隻股開始有芬佬留意，股價有機會再上。
不過，小初就覺得冇所謂，皆因已經賺咗落袋，等日後股價回落，再睇吓翻唔翻炒都未遲。
收市前，經紀陳有電到，問小初記唔記得上個月佢提過嘅上海銘源（233）？
隻股上個月成功埋班後，帶傳媒去上海做推介，股價曾出現單日急升，之後在0.50元樓上橫行，近兩日成交突然急增，噚日最高見過0.70元，收0.64元，大升6.67%，成交金額急增至2569萬元。
經紀陳話，上次提過上海銘源將轉型做生物科技，重話有意同大陸公司簽約合作，用佢哋嘅芯片作為檢驗。據講搞咗一輪後，終於可以在下周一簽約，所以股價借勢先行炒上。
慕容小初