我大口羅拉好記得靚仔妻夫木聰，喺佢啱啱跑出嚟嗰陣，曾經畀啲日本雜誌踢爆過佢同師兄藤原龍也一齊周圍𠝹女，兩個人直頭墮入衰仔失落園。最近妻夫木聰同池囗千鶴合演部新片《JOSE與老虎與魚群們》，雖然佢哋喺入面有好大膽嘅情慾戲，但妻夫木聰就話喺故事中悟出真理，重話自己唔會沉迷喺有性冇愛嘅荒唐生活度喎！
妻夫木聰喺套新片《JOSE與老虎與魚群們》入面，同扮演行動不便嘅池囗千鶴，發展一段真摯又深刻嘅愛情。套片好似常盤貴子嘅《赤月》一樣，未上先轟動，因為池囗喺片中有露點鏡頭，而佢同妻夫木聰，更會喺間愛情酒店嗰度拍床上戲。
單睇率先曝光嘅劇照，我羅拉真係覺得個景好靚，妻夫木聰同池囗好似喺水底世界嘅大貝殼入面瞓醒咁，搞到我羅拉都心郁郁想去嗰間酒店見識吓。
雖然妻夫木聰接受雜誌《FRaU》訪問時話自己都係一般人，見到鍾意嘅女仔都好想同佢搞嘢，但佢覺得身邊嘅男仔，大多係體力好強，意志力唔強。所以佢認為對鍾意嘅人一定要有愛，如果有性冇愛嘅話，根本唔係愛情！