日前，本欄曾為大家介紹過，將於嚟緊東京車展上展出嘅三菱i概念車，原來廠方重有一款名為SE．RO嘅概念車會於場內展出，而此車不但造型突出吸引，車廂布局及機械配搭亦見有一份吸引性呢！
呢款SE．RO嘅概念車，其底盤係源自i概念車，同樣用上中置引擎、後輪驅動模式，但就改用上一台660cc直3DOHCMIVECTurbo偈，並附以CVT無段變速波箱作配搭，性能表現同樣突出之餘，而且重見有慳油嘅特性㖭！至於車廂布局方面，不但空間來得寬敞闊落，車內座椅更可按需要收摺放平，以增加載物容量，又或者令乘坐舒適性倍增；賣相亦見吸引，不但擁有一個酷似縮水MPV嘅造型外，一身電鍍銀色車身色調配襯，亦見有一份吸引力。相信SE．RO若能正式投產的話，勢必成為年輕車迷嘅追捧對象。