經過7.1大遊行之後，老董顯然練得一身好本領，唔理你講乜，引述乜嘢加州例子，佢都一味話「國有國法，家有家規」，一於按《基本法》辦事，做到二○○七年六月三十日先肯走，唔知呢啲係咪叫做「死牛一面頸」。
老董咁堅定不移，死不悔改，連民主黨黨鞭華叔都話冇興趣同佢玩。不過，老董個死對頭港大鍾庭耀就點都唔肯放過佢，專登揀主管港澳事務嘅最高領導人、國家副主席曾慶紅親臨澳門主持「屍爬」簽署儀式之時，發表一個港澳特首嘅民望調查比較，結果香江華輸咗幾十條街畀濠江鏵，人哋有八成人支持，我哋只有一成二，認真羞家。
老董唔知係咪收到風，所以唔敢去濠江朝聖，費事尷尬。政府嘅官方答案係從來都冇話會去，何況董建華要準備今日去曼谷APEC開首腦會，周身唔得閒。
有老董之友向八方話，董生唔係完全輸晒，今次祖國第一個太空人楊利偉升空，老董就喺升空之日下晝四點幾向中央發出第一個賀電（遲過日本仔幾粒鐘）；而鏵哥就喺第二日早上七點幾先恭喜江胡溫，遲過老董十幾個鐘頭，不過鏵哥一個賀電就慶祝發射兼成功着陸。你認為呢鋪應唔應該判老董贏呢？
傳真︰2623-9278
電郵︰