楊恭如同台灣名嘴吳宗憲噚日喺台灣為電影《人不是我殺的》開工，二人重一齊拍攝一場激吻嘅戲，男女主角都拍到好鬼投入，雖然導演朱延平叫停，但係吳宗憲條脷重伸吓伸吓，睇嚟佢好似戲假情真。楊恭如都係一個好易招惹緋聞嘅人，佢哋又拍得咁投入，唔知拍完呢場咀戲後，會唔會有下文呢。
吳宗憲喺開拍時，佢一聽導演講解就做到所有要求，但事後吳宗憲卻自爆呢次係佢嘅銀幕初吻。當吳宗憲拍攝咀戲前，佢好落力咁食香口膠同搽潤唇膏，做足一切準備。楊恭如見到對手咁緊張，佢竟取笑吳宗憲係「兔唇」，楊恭如用國語話：「他狡兔三窟，到處有女人、房子。」搞到吳宗憲鬼咁尷尬。
洪欣噚日喺將軍澳電視廣播城錄影《橫掃千金》，佢話自己嘅強項只係扮靚，所以玩問題遊戲信心唔係好大，原來洪欣近排接咗內地劇集《金瓶梅》，問到佢會唔會性感演出，佢話：「都未知做乜嘢角色，如果劇情需要而且又有得發揮，大膽啲都無所謂，不過電視劇尺度有限，所以唔會太暴露。」洪欣fans聽到唔知會唔會有啲失望呢？
黃子華噚日喺無綫將軍澳電視廣播城傾新劇《楝篤神探》細節，佢會同蔡少芬合作，問到子華對劇集的收視期望，佢話：「我諗破唔到，要留番畀嘟嘟（鄭裕玲）。」子華同圈外女友都拍咗一段時間拖，但佢就無意拉埋天窗，子華話要𢭃多幾年利是，最好朋友嘅仔女都畀利是佢，馮仁昭覺得佢唔止搞笑功力深厚，連面皮都幾夠厚噃！
鞏俐係OSIM嘅全球代言人，佢噚日喺台灣出席義賣活動，着住一身透視裝嘅鞏俐，不停擺出挺胸收腹嘅甫士，謀殺記者唔少菲林。做完宣傳，佢已經即刻返咗北京，鞏俐喺台灣期間，重大量掃佢最鍾意食嘅鴨舌同豆干㖭，佢以國語話：「這次來台灣該買的都買了。」鞏俐咁風騷，睇嚟佢喺台灣嘅宣傳酬金都袋得好輕易啦！
黃耀明原本喺本月尾同下個月一號舉行兩場個人演唱會，由於反應熱烈，𠵱家決定加開下月二號一場。早前黃耀明曾經話過會去蘭桂坊一帶發掘有跳舞天份嘅市民做佢個演唱會嘅舞蹈員。日前佢喺蘇豪區食嘢時，居然有個二十幾歲嘅男子毛遂自薦，重話有很多朋友嘅舞藝都相當精湛，可以唔收錢為黃耀明擔任舞蹈員，咁真係可以慳唔少喎！
