呢個禮拜睇到啲學生負面新聞太多，而且搞到週刊與電台節目有紛爭，辭職記者與週刊有爭拗，再加埋徐嘉慎被恐嚇，滾石樂隊滾到美國商會天旋地轉，香港社會似乎一片無奈、無能，令人洩氣。
好彩睇到一啲「進步」新聞，精神為之一振，要特別講一講。獅球教育基金會（合興油廠洪氏家族創立）主辦，香港電台支持，傑出青年協會、東海海都海鮮酒家集團、吉野家快餐、香港中華煤氣等機構協辦嘅「全港學界最佳進步獎」已經揭曉，十一月二號在九龍公園室內運動場頒獎，三百八十四間學校共五千二百九十五名學生得獎。呢班學生並非甚麼考試狀元、優秀天才，而係從困難環境中掙扎求存，努力上進，抱住永不放棄嘅精神向上爬，從海底深處飛躍上水面嘅勤奮學生，「獅球教育基金」就係為咗鼓勵成績差嘅學生上進，每年都辦呢個最佳進步獎嘅，自九一年以來，已經嘉許咗近六萬名同學。
今年得獎學生之中，有十個突出例子。杜志烜（中二），因父母婚姻問題留級兩次，讀咗三年中一，卒之升上中二，杜志烜考試成績總分八百零五分，比以前嘅五百一十四分，大有進步；李泳享十五歲，曾是逃學威龍，及後改過行為，勤勉上進，由中二考第一百五十九名進步到中三考第二十二名；呂敏婷，十六歲（中二），三年前誤交朋友，輟學，曾離家出走，○二年轉校，得父母老師鼓勵，重新學習，今年考全班第一。重有其他例子，唔知可唔可以留番畀《壹週刊》正面報道吓？