新車速報：<br>本田Accord3.0V6享受至頂級

新車速報：
本田Accord3.0V6享受至頂級

本田推出全新Accord車系，除主打嘅2.4公升i-VTEC型號外，重有至頂級嘅3.0公升V6旗艦車款，不僅設備較前者更突出，一台V6偈表現更見強勁，加上寬敞舒適嘅真皮座艙陳設，還予人感受有動靜皆宜嘅觀感㖭！

記者、攝影：陳偉林
ImageGirl：Sylvia

新一代本田Accord，無論外形、性能同設施，均予人有耳目一新嘅觀感，繼早前代理率先引入咗2.4公升i-VTEC新版之後，頂級嘅3.0公升版亦已相繼抵港；雖然兩者外形相若，但後者響裝備上，較原來2.4公升版本，要來得更豪更齊全，自然令人易於識別兩者嘅身份啦！

配套出眾外貌備受矚目
單睇一對炯炯有神嘅頭燈，原來呢部至Top嘅3.0公升V6型號，係裝有高透光度嘅HID燈，望落格外耀目又備受注目。其次，車身兩邊電動門鏡，重加有方向指揮燈，既奪目又有易於察看嘅好處㗎！匹配上四輪16吋時款合金胎軨配搭，看起來又豈止係一部豪華行政轎車咁簡單呢！

■一對HID大燈編排，重附有原廠霧燈，既透徹又見惡形惡相。

■兩邊門鏡新增有方向指揮燈，倍見出眾又奪目。

■四輪跑車化嘅16吋合金胎軨組合，別具動感一面。

設施講究皮椅又出眾
講到車廂鋪排，前後兩排高級皮椅剪裁講究又妥貼，而前排乘客椅重加設有四段式電子調校，予人愜意舒適之餘，配襯埋四周嘅桃木裝飾，氣派出眾又見貴氣感㖭！除電窗、電鏡及電天窗外，還有高級6碟CD音響連左右獨立恒溫冷氣，少不了重有四個安全氣袋裝置，設備除一應俱全外，細看下手工重唔錯㗎！

■全新鋪排嘅中控台簡潔吸引，有齊6碟CD音響同恒溫冷氣裝置。

■整個座艙以雙色真皮及桃木修飾，既豪邁又見貴氣。

3.0公升V6偈演繹剛勁
新車用上一台3.0公升V6偈，匹配5前速自動波，起跑加速感強而有勁，絕非一般高級轎車可比擬。再者，全新底盤結構，響早前2.4公升型號身上，經已體會有非同凡響嘅觀感，而響呢部至頂級3.0公升V6版本中，輸出剛勁下難得四輪仍能緊抓路面，操控突出又見循迹性高，相信一套新加入TCS系統，匹配四輪碟煞、ABS連EBD裝置，亦起有一定幫助。

■表板旁備有電天窗及TCS開關外，重有卡片匣裝置。

■四幅式半皮半桃木軚環，兩旁重附有定速巡航及音響遙控按鍵。

■軟滑皮椅重附有全方位電控，乘坐愜意又見承托感。

記者評語比2.4版本更強
新車包裝跟同系2.4公升型號，要來得更豪更In，其中一台3.0公升V6偈配搭，明顯有更強爆炸力，難得部車講舒適講享受之餘，全新底盤配搭，亦予人有高操控性同循迹力，表現重直迫房跑車呢！

■後排之間備有杯座外，重有活門直通尾廂。

■原廠天窗兩旁置有出入扶手，又有前後獨立照明。

■一套電子5前速自動波，反應敏捷暢順，好有房跑車Feel。

Sylvia評語：乘坐舒適隔音出眾
部車線條好靚，尤其係一對大燈望落又見有神氣㖭！座艙鋪排好有歐洲車Feel，坐得貼服又舒適，兼且重有出眾嘅隔音體驗㖭！

本田Accord3.0V6規格
引擎：2997ccV6SOHCVTEC
馬力：240ps/6300rpm
扭力：29.3kgm/5000rpm
傳動：5前速自動波，前輪驅動
懸掛：（前）雙搖臂（後）五連桿
制動：（前）透氣碟（後）碟式（ABS）
輪胎：205/60R16MichelinEnergyMXV8
尺碼：4830×1820×1455mm
軸距：2740mm；車重：1545kg
新車售價：$299,000
車輛提供：合群汽車（23802231）

■低腰線設計，行李出入尾廂自然會輕鬆得多。

■新車用上一台3.0公升V6偈，輸出平均有力，重有出眾操控感。