食火鍋最緊要料靚夾新鮮，來來去去都係墨魚丸、魚皮餃、帶冰肥牛加豬骨湯底，無創意冇誠意冇驚喜冇進步，寧可唔食。所以今日要介紹的老字號，用料講究又有創意新菜，用行動證明給你看，老也可以有新意。
記者：陳慧敏
攝影：楊錦文、陳盛臣
老字號厚福館，鎮守九龍城13年，成為九龍城火鍋店的阿大。但原來黑黑實實的老闆黑仔，入行前是飯都不煮一碗的建築判頭：「做了10年判頭做到悶，打開報紙，見到城南道舊舖招頂，咪接嚟做囉！嗰陣時我對飲食界一無所知，諗住做火鍋搵煲水烚吓烚就食得，夠簡單，咁就開始咗喇！」現在老細黑仔朝朝早7點就揸住架Van仔，走遍港九十多個街市，到處搜刮至靚牛肉與正菜。黑仔：「我哋舖頭啲去貨量都好高㗎，一、兩個街市嘅牛肉絕對唔夠食，所以要去多幾個街市早啲搜集，而且唔係個個街市都有靚嘢㗎嘛！」向批發商取靚貨不是更簡單省時嗎？「我份人好心急㗎，且咩事都想親力親為。批發嘅都唔會次次畀晒最好嘅牛肉同海鮮你！親手去揀點都好啲嘅！」
隨着名聲愈做愈大，黑仔野心都愈嚟愈大：去年除了開分店、舊舖重裝、賣埋魚翅之外，本月還加了黑仔親身往泰國一間華僑菜館《傑魚翅》偷師的小炒，又打算明年於深圳或上海開分店，而直接向日本進口松坂牛則正在構思中。「我重有好多嘢想做㗎！可能等呢啲構思都搞掂晒之後，我又突然想做番建築都唔定！」
即使每朝早要跑勻港九做買手，都堅持送一對6歲及11歲的女兒上學；中午又會失蹤兩小時湊女放學，是個超級廿四孝老爸。更因兩個女兒愛吃《傑魚翅》的小炒，他索性站在櫥窗前扮遊客偷師，回來照辦煮碗自己煮，成為舖頭新菜！「不過嗰邊嘅小炒落好多味精，我改良咗，原味好多健康好多！」講到兩個女，本來表情嚴肅的黑仔開始變開籠雀：「我盡量抽時間同佢哋傾多啲偈，佢兩個讀書都幾叻㗎……」
蠔仔肉加豬肉碎，蠔仔鮮味依然突出之餘，混了芹菜粒的豬肉碎又香甜爽口，絕對是搶食之選！
厚福館招牌雪花牛，紅白相間花斑好似用電腦畫嘅咁清晰，黑仔教路落鍋燙7-8下，接近7成熟，入口即化！
相比之下，牛肉餃不及蠔仔餃有口感，不過加了香荽的牛肉磨得細碎，香荽味極度香濃，香味絕對獲勝！
南非鮑肥大肉厚，你可以要求切片或者原隻上，切片雖快熟，但鮑魚口感全無鮮汁盡失，醒目的你知道應該點做啦？
醉酒蟹湯底，特別在於鮮活膏蟹在你面前淋酒點火，夥計將整個煲「拋兩拋」，望住隻蟹由青轉橙再淋湯，「氣」勢非常！
厚福館海鮮火鍋
地址：九龍城城南道57號地下?九龍城南角道73號地下（城南道舖斜對面）
電話：23832822/23832365
營業時間：4:00pm-2:00am
