梁思浩早前同一對夫婦朋友喺尖沙嘴合資經營咗間私房菜，本來都做得好好，不過馮仁昭呢排聽到大股東思浩嘅股份好似俾人食咗，搞到佢好唔開心，成個月冇去餐廳打理生意。
馮仁昭近排重收到一個自稱係佢私房菜前員工嘅告密信，信裏面話思浩鑑於自己係公眾人物，所以對於被騙一事一直啞忍。馮仁昭噚日打電話關心一吓思浩，佢話：「多謝關心，呢件事我已經交咗畀律師處理，我都唔方便講咁多，總之一句講晒，我應該一早聽苑瓊丹嘅說話。無論點都好，我奉勸大家做生意小心選擇合夥人。」
問思浩呢次損失嘅教訓，佢好幽默咁話：「解決咗件事先同大家講，我𠵱家嘅經濟冇問題，我重有港台、無綫同出版社三份工。」
韓君婷噚日喺銅鑼灣出席修護面膜記者會，早排佢俾人影到有肥番嘅迹象，個巨股又再出現，噚日佢着咗件比較闊身嘅衫出現，重話自己一啲都冇肥到，不過因為呢個係面膜廣告，梗係想將個注意力放喺塊面啦，費事大家將焦點放落佢個股度，不過好似都睇到喎。
徐若瑄（Vivian）噚日喺台灣為草莓公主選拔活動做代言人，猛俾人問佢有冇試過俾男友種草莓（咖喱雞），Vivian好大方咁笑住話：「我曾被人種過草莓，也在男友身上種過呀！不過近幾年都沒人種啦！」佢話十八、九歲嗰陣第一次俾男友整咖喱雞，當時已經入咗娛樂圈，不過大家都估佢講嘅人就係吳奇隆。
台灣歌手蔡依林（Jolin）最近拍咗個網上遊戲廣告，着住婚紗吊威吔出場，佢話覺得自己好似《倩女幽魂》嘅小倩。噚日主辦單位喺台灣重搞咗個選駙馬遊戲，fans要用三十字喺網站向蔡依林寫求婚信，選中嘅話就有機會俾蔡依林選做駙馬，重有機會攞到一條萬幾蚊嘅金鏈做獎品，唔知周杰倫有冇份參加呢？
黃馨噚日喺新城接受錄音訪問時大講護膚同衣着心得，佢話其實都唔係好識點保養自己，但佢每朝都會起身飲兩大杯水，平時就跑吓步，間唔中就唔食肉，只食水果同蔬菜清腸胃。着衫方面，佢好抗拒名牌，寧願自己配襯咁話，不過講就咁講啫，其實大家都明，一個新人邊有能力吓吓都着名牌喎！
鳳凰衛視主辦嘅《2003中華小姐環球大賽》，五十位佳麗前晚喺獅子星號會見新聞界，各個佳麗着住嘅性感晚裝總值一百五十萬，其中6號上海夏靜雯大晒三十五吋上圍，佢重自爆同何家勁拍過戲，而16號天津王瑩酥胸半露亦好搶鏡，25號香港韋薇就話好有信心攞獎。
今個月二十五號係陳百強（Danny）逝世十周年嘅日子，唱片公司即將推出一隻Danny嘅精選碟。陳爸爸為表支持，噚日去港台接受訪問，佢話：「我好鍾意聽佢嘅歌，最鍾意嘅係《偏偏喜歡你》、《念親恩》，有時聽到，佢就好似重喺身邊咁。」
