經紀黃上個星期五提過，新上市嘅汽車零部件生產股北泰（2339）獲得芬佬垂青，原來唔係信口開河亂吹水。
北泰新簇簇，本周一先至掛牌，但已有美資大行密密收集，重坐咗10%貨咁多，加上大股東本身揸住75%，貨源相當集中，街貨計落冇幾多。
北泰招股價1.33元，上市首日最高見過1.67元，後來一度回落至1.50元水平，一來係有人沽貨獲利；二來北泰產品以出口為主，國內公布削減出口退稅方案，難免令股價受壓，但公司表明唔受影響後，股價噚日大升7%，收1.68元，成交金額高達4200萬元。
經紀黃話，北泰招股至今新聞少，因為有關人等針對芬佬推銷，散戶方面冇做推廣活動，由於芬佬似乎相當受落，所以股價企得好硬淨。
不過，北泰隻「綠鞋」尚未攞出嚟，稍後包銷商行使超額配股權之時，股價可能受到影響，屆時小初先至諗吓買唔買，𠵱家就唔想高追。
慕容小初