王家衞、木村交換湊仔經Friend番
阿菲蹦蹦跳新Look搶眼

王家衞昨日續在上海拍攝新片《2046》，他透露日前與木村拓哉在片場分享湊仔經。而有份參演此片的王菲抵達拍攝現場時，則像小女孩般跳落車，心情靚絕。
記者黃文偉、何永寧上海直擊

王家衞、王菲和梁朝偉仍在上海拍攝電影《2046》，昨日下午二時半左右，王家衞與一名外籍男士步出威斯汀酒店。

出入有保鑣護送
王家衞抵達上海外灘前東風飯店的拍攝現場後，王菲亦於下午三時左右坐着七人車抵達。王菲心情甚佳，穿了白色貼身長褲配粉藍襯黃addias波鞋的她，上身笠着大外套，似是刻意遮掩其造型。落車時，王菲更如一位小朋友般，由車上跳落地下，而其「肥瘦女保鑣」則繼續貼身保護她。而梁朝偉昨日拍完電影《地下鉄》後，於下午五時左右到達片場試造型。
王家衞接受訪問時說：「木村呢兩日就會返上海拍《2046》，佢只係拉襯筋，唔係好大件事。木村好聰明，啲戲一講佢就明，佢之前試咗個cyber造型，啲衫嘅尺寸啱啱好，唔使改。佢之前嚟上海拍戲嗰陣都未有小朋友，𠵱家就有兩個細路，我哋都有傾吓細路經，交換吓湊仔心得。」而木村前日在日本錄影《SMAP×SMAP》時，只是左手手指綁了繃帶，他在煮食及遊戲環節均活動自如，沒有大礙。

引進荷李活技術
而與王家衞同行的外籍男士Pierre原來大有來頭，他是《22世紀殺人網絡》第二、三集及《搏擊會》的特技指導，今次則是替《2046》做視覺效果。
此外，「2003亞洲巨星反盜版激情演唱會」將會在下月十五日在上海的八萬人體育場舉行，出席的歌手除了王菲外，還有莫文蔚、王力宏、蔡依林、周杰倫、朱孝天、吳建豪和周渝民等等。