個市好反覆，高位有回吐，低位有趁低吸納。中銀（2388）走勢令人歎為觀止，又升80仙，收13.50元。由周正毅事件之後，中銀股價升幅高達7成。
滙豐（005）是日收110.50元，跌1元。喺中銀升幅7成呢段時間，滙豐由94元升上，升幅17%，拍馬追唔上中銀，未來則有機會追番近啲，吼滙豐Call輪有着數。
滙豐Call輪好多任揀，9845昨日跌10仙，跟足正股，現價啱炒，輪價1.49元，負溢價0.5%，槓桿率7.4倍，既然負溢價，再無溢價收縮之弊。未來正股升10%，輪價升幅就係槓桿率乘10。喺隻輪12月到期之前，正股升10%嘅機會，咪話唔存在，中銀過去兩日，升幅就已經啱啱係10%。
滙豐Call輪另外隻9908，又係好抵買，明年1月到期，輪價1.16元，溢價只係1%，但槓桿率則有9.5%。若然滙豐升10元，隻輪升幅就係80%，呢隻交投冇9845咁旺，做短線揀9845，做中線揀9908。
個市反覆，想賭上落，可向恒指Call輪埋手，做法係每當大市回軟之時，趁低買9109或9130，後者賭味重啲。
章 盛