妮歌潔曼（NicoleKidman）自從俾人公開佢同rock友LennyKravitz拍拖後，有人放風話佢哋好快手拖手出席公開場合，見吓啲鄉親父老。不過妮歌未帶男友出嚟之前，前日就同咗一對養子養女去睇棒球，近日經常被目睹陪妮歌同仔女「一家四口」去玩嘅Lenny，唔知當時去咗邊呢？
前日係美國職棒聯盟總決賽第六場賽事，紐約楊基隊主場迎戰波士頓紅襪隊嘅日子。因為工作關係經常陪唔到一對仔女伊莎貝拉（Isabella）同干納（Connor）嘅妮歌，就趁呢一日做個慈母，帶埋對仔女一齊捧楊基隊場。當日妮歌同對仔女睇波睇到好投入，睇到緊張嘅時候重三母子齊齊彈起身，鬼咁肉緊。
前日妮歌睇波雖然着住黑衫黑褲，不過星味依然爆晒棚，喺人群中梗係較易俾人認出。講開妮歌個樣，最近有人睇過佢套新片《ColdMountain》之後，話佢喺套戲入面個額頭硬繃繃，懷疑妮歌喺拍戲之前，喺額頭注射咗肉毒桿菌去皺針喎！
不過講番佢嘅表現，啲人話佢同拍檔雲妮絲惠嘉（ReneeZellweger）做都得好好，有人話佢哋兩個都有機連續三年提名奧斯卡㖭，不過妮歌今次可能再度提名女主角，雲妮就提名女配角囉！