呢個星期，圍繞住豐田嘅消息不斷，既有快將抵港嘅新車資訊，而早前剛抵港嘅第2代環保車Prius，早個星期亞Mark曾經話過，代理以優惠價$169,000開賣，10部限額瞬即售罄，但想唔到代理未有停止接受訂購，至今竟收到超過50部Order㖭！亞Mark向來好少咁HardSale啲新車，惟呢部豐田Prius以混合引擎驅動，極具環保意識同慳油，好切合香港路面同經濟環境需要，加上代理商又唔計較賣車嘅利潤，以求薄利多銷，雖然𠵱家部Prius車價調升多一萬蚊，賣17萬9千，但響日圓高企嘅情況下，亞Mark仍覺得部Prius係超值；若然你想買車之餘，又想替香港環保出一分力的話，就真係不妨考慮吓部Prius喇！查實，擁有全港至大車隊嘅香港政府，雖然手法不如外國嘅文明國家，對呢類環保車有寬免稅款嘅措施，但就懂得兩、三年換車一次，其實好應該替一眾納稅人着想，改用慳油又環保嘅車款啦！