日本料理店喺中環不下十數間，要突圍就要有Gimmick。Joe'sYaki除咗係中環區首間鐵板燒料理店之外，獨特之處係佢提供嘅海鮮夠晒刁鑽；吞拿魚嘅頸部、日本東北部河流獨有嘅香魚、同埋嚟自深海嘅螢光魷魚全部都有得食。負責人Thomas更話選用海鮮種類嘅靈感係嚟自DiscoveryChannel嘅海洋節目，淨係呢個Point都夠晒過癮啦！
記者：馬慶武 攝影：陳智良
以「燒」為主題，Joe'sYaki除咗以鐵板燒為主打外，重有大量爐端燒同串燒食物。單單以「燒」為賣點的確未夠吸引，所以食物選料方面就花咗唔少心思，好似燒吞拿魚頸、燒香魚及螢光魷魚等都係喺香港好難食到嘅。另外全店重有超過27款日本酒，一邊食鐵板燒一邊嗒番杯絕對係最佳享受。
開設中環首間鐵板燒料理店，原來又關SARS事，「可能前排SARS太大鑊喇，好多人包括我自己都對未煮過嘅生嘢有抗拒，惟有係經猛火燒過嘅燒物先夠安全感。」負責人Thomas話香港嘅日本料理店多以魚生、壽司、拉麫為主，一次過可以食勻鐵板燒、爐端燒同串燒嘅店舖唔多，加埋佢所講嘅安全感問題，就決定開設一間以「燒」為主題嘅食店：「而且中環無呢類食店，我哋呢度鐵板燒塊鐵板，可以話係中環區第一塊板！」
至於點解會搵到啲咁冷門刁鑽嘅海鮮返嚟做材料，Thomas就話全靠喺日本生活過：「我喺香港做日本餐廳之前，係喺日本工作嘅，所以試過好多日本得意過癮嘅食物，呢啲螢光魷魚、香魚，喺日本好易食到，香港就較少人引入。」不過，Thomas話其實一直都無諗過將呢啲食物帶到香港，直到睇到一個電視節目就靈機一觸：「介紹海洋生物嗰個節目《藍地球》呀，我嗰次睇到佢介紹深海嗰啲會發光、好似着咗燈咁嘅魷魚、水母，就省起我喺日本食過嘅螢光魷魚。諗吓諗吓，不如將呢啲菜式引入香港，夠突破吖嘛。」就係因為咁，Thomas就帶咗呢啲喺香港較冷門嘅海鮮嚟香港，而且重話會繼續睇DiscoveryChannel啲節目：「睇吓有咩得意海鮮，之後查吓書睇吓可以點整。嚟緊就會有款叫安康魚嘅魚會引入做鐵板燒，即係卡通裏面成日出現，嘴唇厚厚，頭頂吊住盞燈嗰隻呢。」睇見Thomas講得咁雀躍，唔知遲啲嚟Joe'sYaki，可唔可以睇住DiscoveryChannelOrder菜式呢。
吞拿魚嘅頸部，即係魚鰓對後嘅一小段部份，非常矜貴，一條吞拿魚只可做到兩份。吞拿頸部嘅魚肉之中會夾雜筋肉，經過鐵板燒之後筋肉會變軟，入口後筋肉就好似會溶化咁，除咗魚肉之外更多一份口感及魚油香味。而且燒過後嘅吞拿魚頸肉，色澤十足燒牛肉，非常特別。
香魚係嚟自日本東北部河流嘅河魚，因為香魚係食素嘅，所以肉質特別清香，魚肉內豐富嘅魚油亦一啲都唔腥，只要用爐端燒方法加鹽燒，已經勁鮮味，記得千祈唔好食剩魚肉內超鮮味、燒到半透明嘅魚油呀。
螢光魷魚係鹽漬物，即係用鹽生醃嘅，由於生活喺深海時身體會發光，所以叫螢光魷魚。雖然賣相都算超級恐怖，要將佢吞落肚都要一定勇氣，但係食落就知佢嘅鮮甜同爽口程度有幾犀利。
先將本地大蝦燒至8、9成熟，再加上用海膽肉加調味料調製成嘅海膽醬燒一陣就上碟，咬落爽口嘅蝦肉混合蝦鮮味及海膽香，兩種鮮味喺口腔內交錯重叠，配合得淋漓盡致。
比阿拉斯加蟹細嘅雪場蟹，肉質較實較多肉汁，燒起嚟充滿鮮味，蟹味勁香。
Thomas話牛肉只係最外層1mm嘅肉會燒至全熟，用嚟鎖住內裏嘅肉汁，蘸少少香蒜醬油汁，混合埋牛肉咇出嚟嘅肉汁，Juicy而惹味。
地址：中環德己立街21號1樓
電話：28046883
營業時間：
12:00nn-2:30pm，6:30pm-11:00pm
星期日午市休息，星期五、六營業時間至11:30pm
