行人天橋之上，國金二期之外，正欣賞風景之際，碰到寫手S，寫手S乃過氣記者，唔慣現在嘅新聞報道作風，亦唔識埋堆，結果就係離開報界，美其名曰做自由撰稿人，實際就係做長散工，專門同公關公司或上市公司等做吓繙譯、寫吓新聞稿以及做槍手，都叫做搵到兩餐嘅。問寫手S有乜新料，佢若有所思咁話：「最近有保險經紀老友同我講，有一啲蠱惑之人，借投訴保險公司為名，寫信去報紙投訴版亂咁噏，有時報紙一時不察，信以為真，要保險公司交代，保險公司如果一唔小心，答得太詳細，就會洩漏少少人客資料，蠱惑仔就會跟進去搶客？當然呢啲蠱惑仔亦係保險行中人啦。我最近受人所託，寫呢類回覆投訴信，你話我應該點樣落筆先至可以做到滴水不漏呢？」
一時之間，都唔知點答。唔識嘅最好唔答，或借用甚麼條例，盡量少答。但寫手S話：「唔得喎，答得少，報紙又走嚟煩住。我見過一啲濕碎到極嘅投訴，記者都好似追蹤滾石樂隊咁搏命㗎！我舊陣時做記者，邊度得閒理一啲咁芝麻綠豆嘅無謂投訴呀？」
唉，時代唔同咯，現在樣樣事都可以娛樂化、八卦化、醜聞化，總之要小事化大。至於咁做係唔係真係可以爭取到讀者、爭取到廣告，左丁山真係木宰羊，誇張啲講，記者自己間屋漏水，唔得閒理，某間公屋居屋漏水，就要追查三日三夜，務要追到邊個房署官員失職。早知做呢啲嘢嘅話，讀新聞系做乜鬼？