利物浦前日贈奧林比亞三蛋之前，領隊侯利亞突然宣布委任謝拉特，代替希比亞做隊長，理由係謝拉特有領導才能同埋日趨成熟喎。呢個安排有無深層意義怕且得侯利亞自己知，不過好易令人聯想希比亞失去隊長臂章，係同佢今季表現跌watt有關。
喺無傷病情況下季中換隊長，都算罕有。我求大俠雖然唔係紅軍fans，但一直好敬佩「鐵人」希比亞，就算佢今季表現真係無以前咁穩陣，其他隊友都有責任；要佢場場一個打幾個，蛇都死啦。當然，侯利亞乘勢加強謝拉特嘅領導地位，對後者無論待人接物同埋控制情緒一定有正面作用。佢一做隊長紅軍就大勝，認真好腳頭，希望佢能夠繼續用行動證明侯利亞嘅決定無錯啦。
德國老將希士拿果然寶刀未老，前日響足協盃後備上陣射入個自由球不特止，又策動攻勢幫隊友建功，令薩爾斯堡淘汰烏甸尼斯。同樣係德國人，贊卡就無前輩希士拿咁堅，當烏甸尼斯領先一比○時，佢曾經射中柱，否則烏甸一早就出線啦，佢注定做黑仔。
「艾比耶風波」愈鬧愈大，成眾矢之的嘅艾比耶大爆碧咸曾經向佢吐口水，位置係個月亮同星星、象徵土耳其國家嘅隊徽。單嘢鬧到國際層面，連土國外長都出嚟講嘢緩和兩國氣氛。嗱，碧咸百步穿楊大家見識得多，如果艾比耶唔係吹水，碧咸連吐口水嘅眼界都唔差噃。
前曼聯黑雙煞之一嘅約基早前遭小偷入屋爆竊，偷走咗當年幫曼聯攞三冠王其中兩個獎牌——足總盃同埋歐冠盃。約基搭晒路想喺地下市場搵番兩個牌，可惜兩個禮拜都無音訊，𠵱家打算向警方求助。又難怪約基咁緊張，話晒佢足球事業高峯已過，要再攞獎真係唔易㗎。
英甲米禾爾前日炒咗領隊麥基之後，即刻邀前英格蘭國腳中場韋斯做臨時領隊，而年資更深嘅韋健士就從旁協助。計埋韋健士，最近呢幾個月間有唔少英國講波佬有着落教番波，證明曝光率呢樣嘢確係幾重要。唔知幾時輪到另一個講波佬格拉咸呢？